Бағдәулет Төреханов: Алда боксшыларымызды үлкен мүмкіндіктер күтіп тұр
Irfin Promotions компаниясының бас директоры Бағдәулет Төреханов ringkz.com порталына компанияның биылғы жұмысының қорытындысын жасап, келесі жылға арналған жоспарларын айтты.
– Бағдәулет мырза, Irfin Promotions компаниясы биылғы жылды табысты аяқтады деп айтуға болады. Өйткені, 2024 жылы Шымкентте және Алматыда отандық және шетелдік боксшылардың қатысуымен екі үлкен кәсіпқой бокс кеші өтті. Келесі жылға қандай жоспарлар құрып отырсыздар?
– Irfin Promotions промоутерлік компаниясы 2024 жылды табысты аяқтады деп толық айтуға болады. Шымкент және Алматы қалаларында екі кешті жоғары деңгейде өткіздік. Ол кештерде бокс жанкүйерлері тартысты жекпе-жектерді тамашалады. Алматыдағы кеште біз WBA Asia тұжырымындағы белбеуді алып келдік. Алдағы жоспарларға келсек, Таиланд астанасы Бангкок қаласында тайландтық промоутерлермен бірлесіп 1 ақпанда кәсіби бокс кешін өткізу жоспарланып отыр. Боксшыларды медициналық тексерістен өткізіп, алдағы жекпе-жектеріне тыңғылықты дайындап жатырмыз. Ең бастысы, біз төрт боксшыға мүмкіндік беріп, солардың мансабын дамытуға күш жігерімізді салып жатырмыз.
– Қателеспесем, Irfin Promotions 2025 жылы отандық боксшыларды халықаралық нарыққа шығару ниетте екенсіздер. Осы тұрғыда қандай жұмыстар атқарылып жатыр?
– Қазір Бангкокта өтетін бокс кешінің картасымен жұмыс жасап жатырмыз. Тайландтағы бокс кешінде Руслан Мәдиев, Елшат Нығметолла, Нұрдос Төлебай және Армат Арманұлы өнер көрсетеді. Олардың қарсыластарымен келіссөздер жүргізілуде. Жақын арада отандық бокс жанкүйерлері боксшыларымыздың қарсыластарын білетін болады. Сондай-ақ, Елшат Нығметолла 53,5 келіде WBA Asia тұжырымы бойынша чемпиондық титулына жекпе-жек өткізеді. Нұрдос Төлебай мен Армат Арманұлы рейтингтік кездесу өткізеді. Нұрдос Төлебай мен Армат Арманұлы шетелде алғашқы кәсіби бокстағы жекпе-жектерін өткізеді. Одан соң жігіттерді ары қарай дамыту бойынша бағдарлама жасалып жатыр. Ең бастысы, әр боксшыға қойылған мақсат бар, сол мақсатқа жету бойынша жұмыстар жасалып жатыр. Алда боксшыларымызды үлкен мүмкіндіктер күтіп тұр. Ең бастысы, осы берілген мүмкіндіктерді дұрыс пайдаланса, көптеген жетістіктерге жетуге болады.
– Биыл ғана WBA Asia тұжырымы бойынша жартылай орта салмақтағы чемпиондық титулын жеңіп алған Руслан Мәдиев белдігін келесі жылдың басында Қарағандыда өтетін бокс кешінде қорғайды деген ақпарат тараған еді. Алайда бірер күн бұрын ол белдігін Таиландта қорғайтыны туралы мәлімет шықты. Осыған қатысты қандай нақты ақпарат бере аласыз?
– Руслан Мәдиевке келсек, бұл боксшының болашағынан үлкен үміт күтеміз. Русланның әлемдік титулдарды иеленуге толық мүмкіндігі бар. Сондықтан, Таиландта WBA Asia тұжырымы бойынша жартылай орта салмақтағы чемпиондық титулын қорғайды. Одан соң Русланды мықты қарсыластарға дайындаймыз. Толыққанды дайындық лагерін шетелде өткізуге көңіл бөліп жатырмыз. Алда әлемдік деңгейдегі үлкен жекпе-жектер күтіп тұр. Қазіргі таңда Русланға қарсылас табу қиын болып тұр. Өйткені көптеген даңқты шетелдік боксшылар Русланға қарсы шығуға жүрексініп отыр. Қарсыласы белгілі болған жағдайда, отандық бокс жанкүйерлері оны біздің әлеуметтік желілерден бірінші болып біле алады.
