Жәнібек және КО: Астана кешінің боксшылары жекпе-жек алдындағы жаттығу өткізді

Орта салмақта WBO және IBF нұсқасы бойынша әлем чемпионы, қазақстандық кәсіпқой боксшы Жәнібек Әлімханұлы (16-0, 11КО) кезекті жекпе-жегі алдында жанкүйерлер үшін ашық жаттығу өткізді.

Кәсіпқой бокс кешіне арналған ашық жаттығу елордадағы “Ханшатыр” сауда орталығында өтті. Оған бокс кешінің андеркартында шаршы алаңға шығатын былғары қолғап шеберлері де қатысты.

Олардың қатарында Балауса Мұздыман, ағайынды Сабырхандар, Батыр Жүкембаев, Сұлтан Зауырбек, Баходир Джалолов пен Жәнібек Әлімханұлының қарсыласы Анауэль Нгамиссенгу бар.

Жәнібек ашық жаттығудан кейін отандастарына сәлем жолдап, алдағы айқасына қолдау білдіруге үндеді.

Арма, қазақ елі! 5 сәуір күні барлығыңызды Астанадағы “Барыс аренада” күтеміз. Әлем жұртшылығына “Qazaq style”-дың қаншалықты мықты екенін көрсетеміз. Бізге жанкүйер болыңыздар, - деді боксшы.

Жеңіліп көрмеген өзбекстандық аса ауыр салмақтағы боксшы Баходир Джалолов та (14-0, 14 KO) 5 сәуірде Астанада өтетін бокс кешіне қатысу үшін Қазақстанға келді.

Астанада өтетін айтулы кеш қарсаңында Баходир жергілікті жанкүйерлерге алғысын білдіріп, қолдауды сезінетінін жеткізді:

“Әрине, жанкүйерлердің қолдауын сезіп тұрмын. Мұнда жанкүйер өте көп. Жақсы жекпе-жек көрсетеміз деп ойлаймын. Қазақстанға қолдау үшін үлкен рахмет!”, — деді Джалолов.

Баходирдің қарсыласы – украиналық Игорь Шевадзуцкий (12-2, 10 KO). Бұл жекпе-жек хардкор бокс жанкүйерлерінің басты назарында болмақ.

Аталған кеште Өзбекстанның тағы бір үмітті боксшысы Отабек Холматов (12-1, 11 KO) шаршы алаңға шығады. Оның қарсыласы – филиппиндік тәжірибелі былғары қолғап шебері Джейсон Кано Манигос (30-12-2, 20 KO).

Айта кетейік, 5 сәуірдегі Астанадағы бокс кеші – Қазақстан мен Орталық Азияны әлемдік бокс орталығына айналдыруға бағытталған амбициялы жоспардың жарқын бастамасы.

Battle of the Brave кешіне Орталық Азия аймағының ең мықты боксшылары қатысады:

Жәнібек Әлімханұлы (16-0, 11 КО), Қазақстан – IBF және WBO нұсқалары бойынша орта салмақта (72,6 кг) әлем чемпионы;

Баходир Жалолов (14-0, 14 КО), Өзбекстан – екі дүркін Олимпиада чемпионы, суперауыр салмақ боксшысы;

Сұлтан Заурыбек (19-0, 13 КО), Қазақстан – WBA рейтингі бойынша екінші жартылай жеңіл салмақта (59 кг) әлемдік ТОП-3 қатарында;

Отабек Холматов (12-1, 11 КО), Өзбекстан – WBA рейтингі бойынша жартылай жеңіл салмақта (57,2 кг) ТОП-3 қатарында, ал оның жекпе-жегі The Ring журналының "2024 жылдың үздік жекпе-жегі" номинациясына ұсынылған;

Батыржан Жүкембаев (23-1, 17 КО), Қазақстан – бірінші жартылай орта салмақта (63,5 кг) өнер көрсететін Қазақстанның ең танымал кәсіпқой боксшыларының бірі;

Балауса Мұздыман (6-0, 5 КО), Қазақстан – жеңіл салмақта (53,5 кг) WBA Asia чемпиондық белбеуінің иегері. Оны Қазақстан спортының ең көрікті спортшыларының бірі деп те атайды.

Фото авторлары: Айдос Балтабай/Нұрғали Жұмағазы