Желтоқсанға жоспарланған жекпе-жектер
Желтоқсан айында кәсіпқой боксшылар өз жанкүйерлерін жарқын жекпе-жектерімен қуантпақ. 2024 жылдың соңында қазақстандық және шетелдік танымал боксшылар шаршы алаңға көтеріліп, кезекті жекпе-жектерін өткізеді. Әрине, отандық былғары қолғап шеберлері рейтингтік кездесулерге шығып, шетелдік танымал боксшылар әлем чемпионы атақтары үшін жұдырықтаспақ.
Назарларыңызға 2024 жылдың соңғы айы – желтоқсанға жоспарланған ең негізгі жекпе-жектерді ұсынамыз.
Брэд Полс vs Дензел Бентли
7 желтоқсан күні әйгілі промоутер Фрэнк Уорреннің Queensberry Promotions промоутерлік компаниясының ұйымдастыруымен Лондонда (Англия) кәсіпқой бокс кеші өтеді. Сол кештің бас жекпе-жегінде орта салмақтағы (72,6 кг) Ұлыбритания чемпионы Брэд Полс (19-1-1, 11 КО) пен WBO International белбеуінің иегері Дензел Бентли (20-3-1, 17 КО) жұдырықтасады. Кездесу 12 раундқа жоспарланған.
Дензел Бентли 2022 жылдың 12 қарашасында отандасымыз Жәнібек Әлімханұлымен жұдырықтасып, ұпай санымен жеңіске жеткен болатын.
Эмануэль Наваррете vs Оскар Вальдес
8 желтоқсан күні АҚШ-тың Аризона штатындағы Финикс қаласында екінші жеңіл салмақтағы WBO титулының иегері (59 кг) мексикалық Эмануэль Наваррете (38-2-1, 31 КО) «уақытша» чемпион және жерлесі Оскар Вальдеспен (32-2, 24 КО) реванш жекпе-жегін өткізеді.
Рафаэль Эспиноса vs Робейси Рамирес
Сондай-ақ аталған бокс кешінде Мексиканың тағы бір өкілі Рафаэль Эспиноса (25-0, 21 КО) пен екі дүркін Олимпиада чемпионы, кубалық Робейси Рамирес (14-2, 9 КО) жұдырықтасады. Жартылай жеңіл салмақта (57,2 кг) өнер көрсететін боксшылар да реванш айқасын өткізбек. Сондай-ақ WBO чемпиондық атағын сарапқа салады.
Айта кетейік, Наваррете мен Вальдес арасындағы бірінші кездесуде Оскар ұпай санымен жеңіске жеткен болатын. Ал Эспиноса мен Рамирес арасындағы айқаста Рафаэльдің мерейі үстем болған еді.
Хайме Мунгия vs Бруно Сураче
Кезінде отандасымыз Геннадий Головкиннен де, Жәнібек Әлімханұлынан да қашып жүрген екінші орта дивизиондағы WBC Silver титулының иегері Хайме Мунгия (44-1, 35 КО) 14 желтоқсан күні жұдырықтасады. Ол франциялық Бруно Сурачемен (25-0-2, 4 КО) кездеседі. Жекпе-жек Мексиканың Тихуана қаласында өтеді.
Александр Усик vs Тайсон Фьюри
Бұл тек желтоқсан айының ғана емес, осы жылдың ең айтулы жекпе-жегі болмақ. Ауыр салмақтағы қос мықты, қос чемпион – украиналық Александр Усик (22-0, 14 КО) пен британиялық Тайсон Фьюри (34-1-1, 24 КО) 21 желтоқсан күні қарымта айқас өткізеді. Кездесу Сауд Арабиясының Эр-Рияд қаласындағы Kingdom Arena кешенінде ұйымдастырылады.
Екі бокшы арасындағы бірінші айқас дәл осы Kingdom Arena-да өтіп, Усик 114-113, 113-114, 115-112 есебімен жеңіске жеткен еді. Сөйтіп, украиналық боксшы аса ауыр салмақта абсолютті әлем чемпионы атағына ие болды.
Наоя Иноуэ vs Сэм Гудман
Бірінші жеңіл салмақтағы абсолютті әлем чемпионы жапониялық Наоя Иноуэ (28-0, 25 КО) 24 желтоқсан күні белдігін тағы бір мәрте қорғамақ. Ол бұл жолы IBF және WBO рейтингтерінде бірінші сатыда тұрған Аустралия өкілі Сэм Гудманмен (19-0, 8 КО) қолғап түйістіреді.
Зауырбек, Дычко, Ахмедов
Желтоқсанда үш қазақстандық боксшы шаршы алаңға көтеріледі. Олардың екеуі шетелде, біреуі елімізде жұдырықтасады.
Атап айтқанда, Сұлтан Зауырбек 7 желтоқсан күні Ирландияның оңтүстігіндегі Уотерфорд қаласында келесі кездесуін өткізбек. Екінші жеңіл салмақта (59 кг) жұдырықтасатын отандасымыз Польша боксшысы Дамиан Вржесинскиймен (28-3-2, 7 КО) кездеседі. Бұл – Зауырбектің биылғы үшінші жекпе-жегі.
Бірінші жартылай орта салмақтағы талантты боксшыларымыздың бірі Садриддин Ахмедов 14 желтоқсан күні АҚШ-тың Санта-Ине қаласында өнер көрсетеді. Ол жергілікті боксшы Рафаэль Игбоквемен қолғап түйістіреді.
Ал 27 желтоқсан күні Лондон және Рио Олимпиадасының қола жүлдегері Иван Дычко Алматыда жекпе-жек өткізеді. Еліміздегі кәсіпқой бокс кешінде ол ресейлік Виталий Кудуховпен шеберлік байқасады.
