Жеңілген күреске тоймас: Джарон Эннис пен Карен Чухаджян реванш жекпе-жек өткізеді

Жексенбі күні таңертең АҚШ-тың Филадельфия қаласында кәсіпқой бокс кеші өтеді. Онда жергілікті боксшы, жартылай орта салмақтағы IBF тұжырымы бойынша әлем чемпионы Джарон Эннис (32-0, 29 KO) украиналық Карен Чухаджянмен (24-2, 13 KO) жұдырықтасады.

Джарон Эннис

27 жастағы америкалық боксшы қазақстандық бокс жанкүйерлеріне жақсы таныс. Себебі Джарон 2020 жылдың 10 қаңтарында жерлесіміз Бақтияр Эюбовпен шаршы алаңда кездесіп, қазақ боксшысын 4-раундта мерзімінен бұрын жеңіп кеткен еді. Америкалық боксшы отандасымызды бірінші раундта екі рет нокдаунға да жіберген болатын.

Сонымен қатар Джарон Эннис 2021 жылдың 10 сәуірінде Ақтөбе облысының Мәртөк ауданында дүниеге келіп, кейіннен Ресей туы астында жұдырықтасқан Сергей Липинецпен де шаршы алаңда жолыққан. АҚШ-тың Коннектикут штатындағы Нью-Лондон қаласында өткен бокс кешінде Эннис Липинецті 12 раундқа жоспарланған айқастың алтыншы раундында техникалық нокаутпен тізе бүктірген.

Жалпы, америкалық боксшы әуесқой бокста бірталай жетістікке жеткен. «Алтын қолғап» турнирінде топ жарып, жастар арасында АҚШ чемпионы атанған. 2016 жылғы Рио Олимпиадасының жолдамасынан қағылған соң сол жылы-ақ кәсіпқой боксқа ауысып кетті.

Екі жылда 17 жекпе-жек өткізіп, барлығында жеңіске жеткен Эннис әлемдік рейтингте өте жылдам көтерілді. Алайда Джаронның қарқынынан қаймыққан атақты боксшылар онымен жекпе-жекке шығуға тәуекел етпеді. Сөйтіп, америкалық боксшы қатардағы рейтингтік кездесулер өткізуге мәжбүр болды. Тіпті сол кезге дейін мерзімінен бұрын жеңілмеген доминикалық Хуан Карлос Абреуді алтыншы раундта алып жығып, чемпиондар сес көрсетті.

Эннис әлем чемпионы атағына тек 2023 жылы ғана қол жеткізді. Алдымен 2022 жылдың соңында IBF белдігі үшін элиминатор жекпе-жегінде америкалық Кастио Клейтонды жеңсе, 2023 жылы Чухаджяннан басым түсіп, толыққанды әлем чемпионы атанды. Содан кейін екі мәрте белдігін сәтті қорғады.

Карен Чухаджян

Кәсіпқой бокстағы мансабын 2015 жылы бастаған 28 жастағы Карен Чухаджян 2017 жылы WBO нұсқасы бойынша жастар арасында әлем чемпионы атағын жеңіп алды. Ал 2020 жылы Сергей Воробьевті ұпай санымен ұтып, WBA International белдігіне де қол жеткізіп, бокс мамандарының назарын өзіне аудартты. Сонан соң карьерасын Германияда жалғастырып, IBF Inter-Continental атағын алды. 2023 жылы толыққанды IBF белдігі үшін өткен айқаста Джарон Энниспен кездесіп, аса тартысты өткен жекпе-жекте төрешілердің шешімі бойынша қарсыласынан жеңіліп қалды. Үш төреші де 120-108 есебін тіркеп, америкалық боксшының жеңісіне күмән келтірген жоқ.

Енді араға бір жыл салып, екі боксшы екінші мәрте кездеспек. Бұл жолы Джарон Эннис IBF тұжырымы бойынша әлем чемпионы атағын қорғайды. Сіздер қалай ойлайсыздар, Карен Чухаджян реванш жекпе-жекте қарсыласынан есе қайтарып, чемпиондық белдігін тартып алуға шамасы жете ме?