Олимпиада-2024: Нұрбек Оралбай Олимпиада алтыны үшін айқасады
Бокстан Париж Олимпиадасында сынға түсіп жатқан Қазақстан құрамасының жалғыз өкілі Нұрбек Оралбай бүгін жартылай финалдық айқасын өткізіп, жарыстың финалдық кезеңіне жолдама алды. Енді отандасымыз бір аттаса, Олимпиаданың алтынына қол жеткізбек.
80 кг салмақтағы ел үздігі,былтыр Ташкентте өткен әлем чемпионатының жеңімпазы, Азия чемпионатының қола жүлдегері Нұрбек Оралбай Париж Олимпиадасының жартылай финалындаДоминикан республикасы өкілі Кристиан Хавьер Пиналеспен жұдырықтасып, тартысты өткен кездесуде төрешілердің аралас шешімімен жеңіске жетті. Сөйтіп отандасымыз Олимпиаданың алтыны үшін айқасуға жолдама алды. Төрешілер есебі – 3-2.
Нұрбек Париж Олимпиадасының алғашқы айналымында Аустралия боксшысы КаллумПитерспен жұдырықтасты. Өте тартысты өткен жекпе-жекте төрешілер 3-2 есебімен жеңісті қазақ былғары қолғап шеберіне берді. Одан кейін ширек финалда Еуропа ойындарының қола жүлдегері Әзербайжан өкілі МурадАллахвердиевпен шаршы алаңда қолғап түйістірді. Бұл жекпе-жекте отандасымыз айқын басымдық танытып, қарсыласын 5:0 есебімен тізе бүктірді.
Енді Нұрбек Оралбай финалдаәлем чемпионы, Токио Олимпиадасының күміс жүлдегері украиналықОлександрХижняк немесе 2 дүркін Олимпиада чемпионы, әлем чемпионы, Панамерика ойындарының 2 дүркін жеңімпазы кубалық Арлен Лопес Кардонамен жұдырықтасуы мүмкін.
Жартылай финалдан соң Нұрбек Оралбай жекпе-жегін қысқаша қорытындылады. «Қарсыласым өте мықты. Бірінші айналымда Қытайдағы этникалық қазақ ТоқтарбекТаңатқандыжеңген.Ағайларым бұл жекпе-жекке жақсы тактика қойып берді. Соны толық орындап шықтым.Енді мұнымен тоқтамаймыз. Алда финал, барымызды саламыз.Маған қолдау көрсеткен барша қазақ еліне, қазақ жанкүйеріне алғысым шексіз.Екінші раундта нокдаун болуы мүмкін дегендер бар. Нақты білмедім мұны. Әйтеуір, аянып қалғаным жоқ», - деді Нұрбек Оралбай.
Ал бокстан Қазақстан құрамасының бас бапкері Мырзағали Айтжанов Нұрбек Оралбай бапкерлердің айтқан тапсырманы мүлтіксіз орындап, жеңіске жетті дейді.
«Олимпия ойындарында оңай қарсылас деген атымен жоқ. Барлығы да өте қауіпті саналады. Бүгін Нұрбекпен жұдырықтасқан доминикандық боксшы да қара жаяу емес. Ол қандасымыз ТоқтарбекТаңатқаннан бастап, мықты боксшыларды қатардан шығарды.Нұрбек бүгін біздің айтқан тапсырмамызды мүлтіксіз орындады. Оған алға бармай, қарсыласты күтіп алып, қажетті кезде соққы жұмсау керегін айттық. Төрешілердің үш раундта да 3:2 есебін қойғаны туралы ештеңе айта алмаймын. Біз жеңісті бергеніне қуанып жатырмыз. Алда финалдық жекпе-жек күтуде. Нұрбек командадағы барлық жігіттер үшін айқасады», - деді Айтжанов ҰОК баспасөз қызметіне берген сұхбатында.
Сонымен қатар бокстан әйелдер арасындағы жарыста да жалғыз отандасымыз қалды. Әлем чемпионатының екі дүркін жеңімпазы Назым Қызайбай(50 кг) кеше жартылай финалға шығып, кем дегенде қола жүлдені еншісіне салып қойды.
Париж Олимпиадасының ширек финалында Назым Рио Олимпиадасының қола жүлдегеріколумбиялық ИнгритЛорена Валенсия Викториямен қолғап түйістіріп, қарсыласын атақ-даңқына қарамай айқын жеңді. Төрешілер есебі – 4-1. Енді Назым финалға берілер жолдаманы Қытай боксшысымен сарапқа салады.
Ширек финалдағы айқасынан кейін Назым Қызайбай жекпе-жегіне қатысты пікірін айтты. «Бүгінгі колумбиялық қарсыласымнан әлем чемпионатында ұтылып қалған едім. Осы жолы есе қайтаруға тырыстым.Негізінен, ақылмен жеңдім деп айта аламын. Тактика сондай болды.Келесі қарсыласым да оңай емес, қытайлық боксшы. Ол – әлем және Азия ойындарының чемпионы.Десе де, жекпе-жекке жақсы дайындалып, жеңуге тырысамын. Алтын медальға таласуға бар күшімді саламын», - деді Қызайбай ҰОК баспасөз қызметіне берген сұхбатында.
Екі боксшымызға да алдағы маңызды жекпе-жекте сәттілік тілейміз және екеуінен де алтын жүлде күтеміз!
Фото: Сали Сабиров
