Кәсіпқой бокста әлем чемпионы атанған отандық боксшылар
Кәсіпқой боксшылардың статистикасын жүргізетін әлемдік Boxrec сайтының дерегі бойынша бүгінге дейін отандық 300-ге жуық боксшы кәсіби бокс шаршы алаңда жұдырықтасқан. Қазіргі уақытта 100-ге жуық былғары қолғап шеберіміз жоғары жетістіктерге қол жеткізу үшін өнер көрсетіп жүр. Дегенмен, сол боксшылардың барлығына бірдей кәсіпқой бокс әлемін бағындырып, әлем чемпионы атану бақыты бұйыра бермейді.
Алайда, кейінгі жылдары еліміздің боксшылары арасынан әлем чемпиондары шыға бастады. Әзірге Қазақстан кәсіпқой боксшылары арасында алты әлем чемпионы шықты. Олар:
1. Василий Жиров
Ел боксшылары арасынан ең бірінші болып кәсіпқой боксқа ауысқаны да, алғашқылардың бірі болып әлем чемпионы атанғаны да «Балқаш Барысы» лақап атымен танымал – Василий Жиров. Жерлесіміз 1999 жылдың 5 маусымында америкалық Артур Уильямсті 7-раундта техникалық нокаутпен жеңіп, IBF ұйымы бойынша бірінші ауыр салмақтағы чемпиондық атақты жеңіп алды. Сондай-ақ ол бұл мәртебесін үш рет қорғап үлгерді.
Сонымен қатар Василий Жиров 1996 жылғы Атланта Олимпиадасында отандық боксшылар арасында бірінші рет топ жарып, Вэл Баркер кубогының иегері атанды.
2. Бейбіт Шүменов
2007 жылы кәсіпқой боксқа қадам басқан Бейбіт Шүменов 2016 жылы екі салмақ дәрежесінде әлем чемпионы атанды. Арадан 10 жылға жуық уақыт өтсе де, әлі күнге дейін бірде-бір боксшымыз Бейбіттің биігіне шыға алмай келеді. Ол 2010 жылдың 29 қаңтарында испаниялық Габриэль Кампильоны жеңіп, WBA ұйымының жартылай ауыр салмақтағы титулын иеленді. 2016 жылдың 21 мамырында тағы бір америкалық Джуниор Энтони Райтты жеңіп, WBA тұжырымы бойынша бірінші ауыр салмақтағы чемпиондық атағын алды.
3. Геннадий Головкин
Геннадий Головкин – қазақстандық кәсіпқой боксшылар арасындағы үшінші әлем чемпионы. 2006 жылы кәсіпқой боксқа ауысқан Гена арада 4 жыл салып WBA ұйымы бойынша чемпиондық белдікті жеңіп алды. Кейінірек 2011 жылдың 9 желтоқсанында – IBO, 2015 жылдың 17 қазанында – IBF және 2016 жылдың 18 мамырында WBC ұйымдары бойынша орта салмақтағы чемпиондық титулдарын иеленді.
4. Жанат Жақиянов
WBA ұйымы бойынша жеңіл салмақтағы әлем чемпионы (7 қараша 2015 жыл – 21 қазан 2017 жыл).
5. Данияр Елеусінов
2021 жылы Данияр Елеусінов Астанада өткен бокс кешінің басты айқасында рингке шығып, жартылай орта салмақта IBO тұжырымы бойынша әлем чемпионы атағын жеңіп алды. Сол жекпе-жекте отандасымыз аргентиналық Хуан Эрнан Леалдан (15-1) төрешілердің шешімі бойынша басым түскен еді. Алайда, Данияр Елеусінов аталған белдігін бір жылдың ішінде қорғамағандықтан, ұйым жерлесімізден чемпиондық атағын тартып алды.
6. Жәнібек Әлімханұлы
Геннадий Головкиннен кейін Жәнібек Әлімханұлы орта салмақтағы WBO және IBF белдіктерін жеңіп, екі ұйым бойынша әлем чемпионы атанды. Жәнібек 2022 жылдың 21 мамырында АҚШ-та британиялық Дэнни Дигнумды жеңіп, WBO белдігін иеленді. Кейін 2023 жылдың 14 қазанында германиялық Винченцо Гуальтьериді ұтып, IBF белдігіне қол жеткізді. Әлімханұлы осы уақытқа дейін WBO белдігін 4 рет, IBF белдігін 1 рет сәтті қорғады.
