Алматыдағы бокс кешінің БАРЛЫҚ ҚАЗАҚСТАНДЫҚ ҚАТЫСУШЫЛАРЫ (preliminaries)
21 қыркүйекте Алматыда өтетін бокс кеші аясындағы 8 жекпе-жектің бірінші, яғни preliminaries бөлімінде 5 кездесу өтеді. RingKZ порталы осы бес жекпе-жекте өнер көрсететін барлық қазақстандық қатысушылар туралы жан-жақты ақпарат ұсынады.
Саматәлі Төлтаев (2-0)– жеңіл салмақ (61,2 келіге дейін), 4 раунд
Жасы - 24-те. Қазақстан атынан халықаралық аренада 16-17 жасынан бастап қатысады. Саматәлі - жастар арасындағы Азия чемпионы (2017 ж.), жастар арасындағы әлем чемпионатының күміс жүлдегері (2016 ж.). Ол бокстан Қазақстанның ересектер құрамасына да ерте жолдама алды, мысалы, Аммандағы Азия чемпионатының қола жүлдегері атанды (2022 ж.).
Кәсіби рингте 2024 жылы дебют жасады. Әзірге Стамбул мен Алматыда 2 жекпе-жек өткізді. Екі кездесуде де ұпай бойынша жеңіске жетті.
Армат Арманұлы (0-1) – орта салмақ (72,6 келіге дейін), 4 раунд
Жасы - 20-да. Армат - жастар арасындағы Азия чемпионатының қола жүлдегері (2021 ж.), Астанада өткен "Elorda cup-2024" халықаралық турнирінің күміс жүлдегері.
Кәсіби бокста 8 маусымда Шымкентте қазақстандық Irfin Promotions промоутерлік компаниясы ұйымдастырған бокс кешінде дебют жасады. Армат төрешілер шешімі бойынша ресейлік тәжірибелі қарсыласына жол берді. Дегенмен мамандар бұл боксшының әлеуетін ерекше атап өтті. Нәтижесінде ол Алматыда 21 қыркүйекте Irfin Promotions ұйымдастыратын жаңа бокс кешіне қатысу мүмкіндігіне ие болды.
Әлішер Әбдуәлім (1-0, 1 КО) – жартылай орта салмақ (66,7 келіге дейін), 6 раунд
Жасы - 22-де. Мамандардың назарын Қазақстанның әртүрлі өңірлік турнирлерінің жеңімпазы ретінде аударған, сондай-ақ жасөспірім және жастар арасындағы жарыстарда танылған. Ересектер деңгейінде де жарқын өнер көрсетті. Мысалы 2022 жылы ел чемпионатында жүлдегер атанған болатын.
8 маусымда Шымкентте өткен бокс кешінде ол өзінің кәсіби рингтегі алғашқы және әзірге жалғыз жекпе-жегін өткізді. Сол кезде ол 1-раундта мерзімінен бұрын және өте айқын жеңіске жетті. Себебі Әбдуәлімнің қарсыласы үш рет (!) нокдаунға түсіп, жекпе-жек тоқтатылды.
Санатәлі Төлтаев (1-0, 1 КО) – бірінші жартылай орта салмақ (63,5 келіге дейін), 6 раунд
Жасы - 24-те. Саматәлі Төлтаевтың егізі. Санатәлі - 2017 жылғы Азия жастар чемпионатының жеңімпазы, 2019 жылғы ересектер арасындағы Азия чемпионатының қола жүлдегері. Бірнеше жыл бойы ірі турнирлерде Қазақстан атынан өнер көрсетті. Белградта 2021 және Ташкентте 2023 жылғы әлем чемпионаттарына қатысты. Сербия астанасында Санатәлі ширек финалда 2:3 есебімен шотландиялық боксшыдан жеңіліп қалды. Өзбекстан астанасындағы екінші жекпе-жекте ол үш Олимпиаданың қатысушысы және британиялық Достастық ойындарының күміс жүлдегері Маврикийден келген Ричарно Коленге есе жіберді.
Кәсіби рингте 2024 жылдың 1 маусымында Алматыда өткен бокс кешінде дебют жасады. Онда ол 3-раундта кәсіби бокста 21-ші жекпе-жек өткізген ресейлік Дмитрий Хасиевті техникалық нокаутпен мерзімінен бұрын жеңді.
Әділет Құрметов (2-0) – екінші жеңіл салмақ (59 келіге дейін), 6 раунд
Жасы - 30-да. Әуесқой бокстағы мамандарға бұрыннан белгілі. Әділет – 2016 жылғы Қазақстан чемпионы. 2017 жылы Гамбургтегі әлем чемпионатында ел атынан бақ сынаған. Медальдар үшін таласта Еуропа чемпионатының күміс жүлдегері Отар Эраносянға жеңілді. Айта кетейік, Отар Гамбургте қола медаль иегері атанды.
Кәсіби бокста Құрметов 2021 жылы екі жекпе-жек өткізіп, өзін сынап көрді. Ол алдымен 4 раундтық, содан кейін 6 раундтық жекпе-жек өткізді. Екеуінде де төрешілердің бірауыздан шешімімен ұпай бойынша жеңіске жетті. Содан кейін қайтадан әуесқой боксқа бет бұрып, кәсіби рингке көп шықпады.
