Қанат Ислам мен Эгис Климас тандемінен не күтеміз?
Қазақтардың ішіндегі нағыз «Qazaq»-тарының бірі Қанат Ислам жаңа промоутермен келісімшартқа отырды. Енді оның АҚШ-тағы карьерасын әйгілі Эгис Климас жүргізетін болады.
Жалпы, жасырып қайтеміз, Қанат Ислам туралы мақала емес, бір ауыз пікір жазудың өзі қиын. Ойың оның жанкүйерлерімен ұштаспаса, әлеуметтік желіде түтіп жеуге дайын. Сондықтан, Қанаттың америкалық менеджер Эгис Климаспен келісімшартқа отырғаны туралы жаңалықты екі күн бұрын естігенімізбен оны ой елегінен өткізіп, пісіріп, қағазға енді ғана түсіріп отырмыз. Сонымен, бұл тандемнен біздің «Qazaq» не ұтады?
Алдымен Қанаттың бұған дейінгі промоутері жайлы бірер сөз айта кетейік. Жазсаң, Нельсон Лопесті жамандағандай боласың. Бірақ, шындығына келгенде мұртты промоутер жерлесімізге ешнәрсе бере алған жоқ. Рас, соның жетекшілігімен Ислам 25 жекпе-жек өткізіп, барлығында жеңіске жетті. Еншісінде WBA Inter-Continental белбеуі бар. Алайда, сол 25 қарсыласының бірде-біреуі әлемдік деңгейдегі боксшы емес. Ал мұнша айқасты Қанат Ислам өзге промоутермен де өткізер еді. WBA Inter-Continental белбеуін басқа менеджер де ұйымдастырып берер еді. Сондықтан, Қанат Исламның дәл осындай дәрежеге жетуі Нельсон Лопестің емес, басты қолдаушысы Бауыржан Оспановтың арқасы.
Сол үшін де жерлесіміз өзінің промоутерін ауыстырғанда бірінші болып қуанғандардың бірі – осы мақаланың авторы. Ал Эгис Климас деген кім? Неліктен бұл тандемге үміт артып отырмын?
Эгис Климас дегенде ең бірінші есімізге Василий Ломаченко мен Сергей Ковалев түседі. Рас, Ломач әйгілі Боб Арумның «Топ Ранк» компаниясының аясында жұдырықтасады, ал «Крашердің» карьерасын Кэти Дува жүргізіп жатқанымен бұларды осынау промоутерлермен таныстырып, сұраған қарсыластарын тауып беріп отырған да осы Эгис Климас. Бұл екеуінен бөлек Климастың «портфолиосында» Александр Усик, Олександр Гвоздик, Александр Беспутин сынды боксшылар бар. Қазақстандық Мадияр Әшкеев, Мейірім Нұрсұлтанов, Асхат Уәлиханов сынды жігіттердің де Мұхиттың арғы жағындағы карьерасын жүргізіп отыр.
Жалпы, Эгис Климас Литваның тумасы. 80-ші жылдардың соңында қалтасына түскі асқа жетерліктей ғана ақшасын салып Америкаға аттанып кеткен ол бастапқыда пицца қораптарын қаптаумен айналысқан екен. Кейін АҚШ-та отандастарымен танысып, теңіз шаяны өнеркәсібімен айналыса бастапты. Осы жерде тәулігіне 20 сағаттай жұмыс жасап, 3 айда 15 мың доллар тапқан. Міне, оның кәсіпкерлігі осылай басталды. Тапқан табысына арзан бағаға спорттық жабдықтар сатып алып, оны Литваға әкеліп үстеме бағаға сатқан. Осылайша кәсібін кеңейтіп, Америкадан да, ТМД елдерінен де таныстар таба бастаған. Ал бокс оның бала күнгі сүйікті спорты еді. АҚШ-та аяққа тұра бастаған ол кәсіпқой боксқа да бет бұрып, Лас-Вегастағы жекпе-жек кештеріне жиі баратын. 2003 жылы Америкаға Сергей Ковалевті әкелді. Қазір ол өз салмағында әлемнің үздіктерінің бірі. Василий Ломаченконы да бірге жұмыс жасауға көндірді. Қазір ол P4P бойынша әлемдегі үздік боксшылардың бірегейі.
Бір сөзбен айтқанда, Эгис Климас тауарды тиімді бағаға өткізе білетін жақсы саудагер. Кез келген адамның тілін таба білетін психолог. Жоқтан бар жасай алатын тәжірибелі кәсіпкер. Сондықтан, бұл тандем біздің «Qazaq» үшін жемісті болатынына сенімдіміз. Рас, бірден чемпиондық айқастар өткізе қоймас, бірақ екінші немесе үшінші жекпе-жегінде жерлесіміз толыққанды чемпиондық белбеуге таласып жатса, таңғалмаймыз. Кім біледі, бәлкім, жыл соңында-ақ Қанат Исламның есімі Геннадий Головкинмен қатар аталып қалатын да шығар.
