Санәтәлі Төлтаев: 6-8 раундтық жекпе-жектерге дайынмын
Жуырда Алматыдағы Sadu Arena кешенінде Irfin Promotions промоутерлік компаниясының ұйымдастыруымен халықаралық кәсіпқой бокс кеші өтіп, қазақстандық былғары қолғап шеберлері жергілікті жанкүйерлерді жарқын жеңістерімен қуантқан еді. Сол кеште Санәтәлі Төлтаев та өнер көрсеткен болатын.
Әуесқой бокста біраз жетістікке жетіп, биылдан бастап кәсіпқой бокста жұдырықтасып жүрген Санәтәлі Төлтаевтың аяқ алысы жаман емес. Биыл үш кездесу өткізіп, соның барлығын жеңіспен аяқтады. Жеңіл салмақта (61,2 кг) жұдырықтасатын жерлесіміз Алматыдағы бокс кешінде ресейлік Магомедрасул Омаровпен қолғап түйістіріп, қарсыласын екінші раундта техникалық нокаутпен тізе бүктірді.
Жекпе-жектен кейін Санәтәлі кездесуге қатысты ойын ортаға салды.
Бокс кешінде өте жақсы жекпе-жек өткіздім деп ойлаймын. Қарсыласым да мықты, жақсы дайындықпен келгені көрініп тұрды. Дайындық барысында бапкеріммен бірге оның бұрынғы кездесулерін қарап, зерттеп, осал тұсын табуға тырыстық. Әсіресе, қарымта шабуылға арнайы дайындалдық. Яғни, қарсыласымның соққысын тойтара отырып, өзімнің мақсатты соққыларымды дәл тигізуге тырыстым. Рингте ойымдағының бәрін 100 пайыз жүзеге асыра алдым деп ойлаймын, - деп атап өтті Санәтәлі Төлтаев.
Сондай-ақ Санәтәлі жекпе-жекті мерзімінен бұрын аяқтауды жоспарлағанын айтты.
Жекпе-жекке дайындық барысында да, кездесу кезінде де мерзімінен бұрын аяқтаймыз деген жоспар болды. Нокаут болмаса да, қарсыласымды техникалық нокаутпен жеңемін дегенмін, - дейді боксшы.
Отандасымыз уақыт өте кәсіпқой боксқа бейімделіп келе жатқанын, алдағы уақытта 6-8 раундтық айқастарға дайын екенін жеткізді.
Мұның алдындағы жекпе-жектерде 6 раунд жұдырықтасып жүрген едім. Алайда осы кездесуге промоутерлік компания 4 раундтық айқасты ұсынған соң, раунд санына қарамай қабыл алдым. Алдағы уақытта 6-8 раундтық кездесуге дайынмын деп есептеймін. Орайы келіп тұрғанда, осы жекпе-жекте бізді қолдаған барша жанкүйерге ерекше алғысымды білдіремін. Сіздерді алдағы уақытта да жарқын жеңістермен қуантуға тырысамыз, - деді С. Төлтаев.
