Астанадағы бокс кеші: Боксшылар жанкүйерлерге тартысты жекпе-жек ұсынуға дайын
Ертең елордадағы «Барыс Арена» спорт кешенінде отандық бокс жанкүйерлері тағатсыздана күткен үлкен кәсіпқой бокс кеші өтеді. Жекпе-жекте еліміздің және Өзбекстанның даңқты боксшылары шетелдік қарсыластарымен күш сынасады. Бүгін бокс кешінде өнер көрсететін барлық былғары қолғап шеберлері жекпе-жек алдындағы ресми іс-шараларды толық аяқтады.
Боксшылар бір-бірі туралы не айтты?
2 сәуір күні боксшылар «Хан Шатыр» ойын-сауық орталығында жанкүйерлерге арнап ашық жаттығу өткізсе, кеше жекпе-жек алдындағы баспасөз мәслихатына қатысып, журналистердің сұрақтарына жауап берді.
Жәнібек Әлімханұлы: «Біз Анауэль Нгамиссингені жан-жақты зерттедік. Оның ерекше бір артықшылығы немесе айрықша стилі бар деп айта алмаймын. Бірақ әлсіз тұстарын байқадым, оны рингте ескеремін. Шынымды айтсам, жекпе-жекте мен жай ғана соққы жасай беремін. Себебі, оның шеберлігі, мықты тұстары немесе қорқатындай артықшылығы байқалмады. Жекпе-жекті көрсеңіздер, бәрін өздеріңіз көресіздер.»
Анауэль Нгамиссинге: «Шынымды айтсам, мен Жәнібекті бұрын білмеген екенмін. Бірақ онымен жекпе-жек өткізу туралы ұсыныс түскенде бірден келістім. Ол — өте тәжірибелі боксшы, орта салмақтағы чемпион. Өте мықты, техникасы жоғары әрі ақылды. Мен үнемі осындай жоғары деңгейдегі қарсыластармен жекпе-жек өткізгім келеді. Оның екі-үш жекпе-жегін көріп, талдадық. Қарсыластары кейбір сәттерде оның қателіктерін пайдаланып жатты. Бұл жайттарды командамызбен ескердік. Сондықтан біз жеңіске жететінімізге сенімдіміз. Жәнібекті жеңіп, екі чемпиондық белбеуді Францияға алып кетемін.»
Бүгін боксшылар Rixos President Astana қонақ үйінде салмақ өлшеу және дәстүрлі көз түйістіру (face-to-face) рәсімінен өтті. Бұл рәсімге кештің басты қаһармандары — IBF және WBO тұжырымдары бойынша орта салмақтағы әлем чемпионы Жәнібек Әлімханұлы (16-0, 11 КО) және Франциядан келген қарсыласы Анауэль Нгамиссинге (14-0, 9 КО) қатысты.
Кештегі жаңалық: Екінші жеңіл салмақта жұдырықтасатын Махмұд Сабырханның қарсыласы ауысты. Енді ол Вьетнамнан келген Данг Дак Хайнхпен жекпе-жек өткізеді.
Боксшылардың салмақ көрсеткіштері:
Орта салмақтағы чемпиондық айқас (72,6 кг), 12 раунд
Жәнібек Әлімханұлы (Қазақстан, 16-0, 11 КО) — 72,35 кг
Анауэль Нгамиссинге (Франция, 14-0, 9 КО) — 72,05 кг
IBF Intercontinental: Екінші орта салмақ (58,9 кг), 10 раунд
Сұлтан Заурбек (Қазақстан, 19-0, 13 КО) — 59,9 кг
Азинга Фузиле (ОАР, 18-2, 12 КО) — 58,74 кг
Аса ауыр салмақ, 10 раунд
Баходир Джалолов (Өзбекстан, 14-0, 14 КО) — 114,10 кг
Игорь Шевадзуцкий (Украина, 12-2, 10 КО) — Салмағы әлі белгісіз
Бірінші орта салмақ (64,4 кг), 10 раунд
Батыр Жүкембаев (Қазақстан, 23-1, 17 КО) — 64,35 кг
Кейн Гарднер (Ұлыбритания, 17-4, 7 КО) — 63,60 кг
Екінші жеңіл салмақ (55,2 кг), 6 раунд
Махмұд Сабырхан (Қазақстан, дебют) — 55,34 кг
Данг Дак Хайнх (Вьетнам, 2-1, 2 КО) — 54,78 кг
Әйелдер арасындағы жекпе-жек: жеңіл салмақ (53,5 кг), 8 раунд (2 минуттан)
Балауса Мұздыман (Қазақстан, 6-0, 5 КО) — 54,46 кг
Мария Тереза Пинили (Филиппин, 7-1, 2 КО) — 53,26 кг
Жартылай жеңіл салмақ (57,1 кг), 8 раунд
Отабек Холматов (Өзбекстан, 12-1, 11 КО) — 57,4 кг
Джейсон Кано Манигос (Филиппин, 30-12-2, 20 КО) — 56,92 кг
Жартылай орта салмақ (69,9 кг), 6 раунд
Төрехан Сабырхан (Қазақстан, дебют) — 69,1 кг
Йиржи Хауке (Чехия, 4-6, 2 КО) — 70 кг
Жартылай орта салмақ, 6 раунд
Ақниет Әлімбай (Қазақстан, 2-0, 1 КО) — 70,30 кг
Йозеф Дубски (Чехия, 1-0, 1 КО) — 70,20 кг
Жартылай орта салмақ, 6 раунд
Әлішер Әбдуәлім (Қазақстан, 3-0, 2 КО) — 70 кг
Ашиш Чаудхари (Үндістан, 3-0, 0 КО) — 70,6 кг
Бокс кешін тікелей эфирде Qazaqstan және Qazsport телеарналары көрсетеді. Сондай-ақ жекпе-жекті ESPN+ платформасынан тамашалауға болады. Басты ұйымдастырушы — Nomad Promotions компаниясы.
