Абсолютті чемпион! Бетербиев тарихи жекпе-жекте Биволды жеңді
Эр-Риядта (Сауд Арабиясы) тарихи бокс кеші өтіп, оның басты жекпе-жегінде екі ресейлік Дмитрий Бивол (23-1, 12 КО) мен Артур Бетербиев (21-0, 20 КО) кездесті. 12 раундтың қорытындысы бойынша төрешілердің шешімімен Артур Бетербиев жеңіске жетіп, жартылай ауыр салмақтағы абсолютті чемпион атанды. Бетербиев өзінің жеңіс сериясын 21-ге ұзартса, Бивол мансабында алғашқы жеңіліске ұшырады. Ringkz.com порталы тартысты әрі даулы өткен кездесуге қатысты материал әзірледі.
Әлем бойынша бокс сүйер қауым асыға күткен жекпе-жек өте тартысты аяқталды. Бәрі бекер емес екен! Ресейлік жанкүйерлер өзінің абсолютті әлем чемпионын қарсы алды. Жекпе-жек алдында біреуді фаворит қатарына шығару өте қиын болды. Кездесу соған дәлел болды.
Жігіттер рингке барынша жинақы шықты. Бәрі күткендей, Бивол жекпе-жекті белсенді бастады, бірақ алға қатты шықпады. Ол алыстан көп соққы жасауды жөн көрді. Бетербиев болса жоғары блокқа жасырынып, отандасын аңдумен болды. Дегенмен Дмитрий арасында күшті соққыларымен көзге түсіп, тіпті Артурды бірнеше рет есеңгірете жаздады. Алайда әр кезде Артур жауап беруге тырысты.
Осылайша алғашқы раундтар Биволдың пайдасына шешілді десе болады. Себебі Дмитрий рингтің ортасына нық тұрып алды, ал оның қарсыласы қорғана жүріп, контршабуылдар жасап жүрді. Биволдың жылдамдығы көзге жақсы көрінді, ал Бетербиевке белсенділік жетіспеді.
Үшінші раундта жекпе-жектің қарқыны арта түсіп, ауыр соққылар біртіндеп көбейе бастады. Бұл Артурға қолайлы мәнер еді, себебі ол өзінен күткен тактиканы жүзеге асыра бастады. БТР аталып кеткен боксшы Биволды бұрышқа ығыстырып, қамап қоюға тырысты. Алайда "аяғы жеңіл" Дмитрий қақпандардан оңай сытылып кетіп жүрді.
Биволдың әдеттегіден әлдеқайда аз соққы тастап жатқаны да таңқаларлық болды. Шамасы жаттықтырушылар штабы оған көп күш жұмсамай, қорғанысқа көңіл бөлуді тапсырған болуы керек. Десе де әр раунд сайын Артур жылдамдықты арттырып, шаршы алаңның ортасына жайғаса бастады. Бірақ Бивол да керемет қарсы шабуыл жасап, 7-раундта қарсыласының қорғанысын сәтті бұзды. Әр жақсы шабуылға Артур да барынша жауап беріп отырды.
Осылайша алма кезек шабуылмен өткен кездесудің тағдырын чемпиондық раундтар шешуі керек еді. Сөйтіп 9-раундтан бастап Бивол қарқын қосып, көбірек соққы жасап, сериялық жұмысты жиі істей бастады.
Дмитрий өз қарқынын тапқандай болды, бірақ Артур да өз қарқынын жоғалтқысы келмеді. Біреуі тез қозғалып, күшті соққылар жасамады, екіншісі бұрыштарды кесіп, қарсыласын канатта ұстауға тырысты. Биволдың қорғанысы өте жақсы болды, ал Бетербиев күшті соққыларын шаршамай тастай берді. Қалған раундтар осындай прессинг пен контршабуылдармен өтті. Артур алғаш рет қарсыласын нокаутқа түсіре алмады!
Жекпе-жектің нәтижесін төрешілер шешті. Олардың шешімі бойынша жеңіске Артур Бетербиев жетті. Есеп: 114-114, 115-113, 116-112.
