Астана уақытымен 2 тамызға қараған түні Лас-Вегаста жеңіл салмақта екі чемпиондық жекпе-жек өтеді. William Zepeda мен Lamont Roach Jr. бос тұрған WBC белбеуін сарапқа салады. Ал Raymond Muratalla IBF чемпионы атағын Robson Conceicao-дан қорғайды.
Бокс кеші қарсаңында спортшылар дайындығы, жекпе-жек жоспары және алдағы мақсаттары туралы айтты.
Zepeda: Shakur-дан жеңілу мені күшейтті
William Zepeda үшін бұл Shakur Stevenson-нан жеңілгеннен кейінгі алғашқы жекпе-жек болады. Мексикалық боксшы сол кездесу оның тек техникалық кемшіліктерін ғана емес, эмоциясын бақылауға қатысты мәселелерін де көрсеткенін мойындады.
Zepeda дайындық кезінде сабыр сақтауға, жекпе-жек қарқынын басқаруға және сәтсіз сәттерден кейін концентрациясын жоғалтпауға ерекше көңіл бөлгенін айтты. Бұған дейін мексикалық боксшы көп соққы жұмсап, қарсыласына үздіксіз қысым жасауға сүйенетін. Енді ол әлдеқайда есеппен әрекет етпек.
«Біз тек алға жүріп, соққы жұмсай бермей, қысымды ақылмен жасауымыз керек», — деді Zepeda.
Ол әдеттегі агрессиясының Roach-қа тиімді болуы мүмкін екенін түсінеді. Өйткені америкалық қарсыласының қателіктерін жақсы байқайды және дәл қарсы соққы жасай алады. Сондықтан Zepeda дене мен басқа кезек шабуыл жасап, комбинациялар қолдануды және өз шабуылынан кейін қарсыласының алдында тұрып қалмауды жоспарлап отыр.
Roach қарсыласының болжамды стилін пайдаланбақ
Roach Zepeda-дан үлкен өзгеріс күтпейді. Оның пікірінше, мексикалық боксшы өзіне көптеген жеңіс әкелген стиліне адал болады. Яғни үнемі алға жылжып, көп соққы жұмсап, қарсыласын физикалық тұрғыдан басуға тырысады.
Roach бұл тәсілдің тиімді екенін мойындайды. Бірақ тұрақты шабуыл қарсы соққы жасауға мүмкіндік береді деп есептейді.
«Ол үнемі алға жүреді және мұны өте жақсы орындайды. Бірақ мен көрген әрбір мүмкіндікті пайдалануға тырысамын», — деді Roach.
Roach-тың басты артықшылығы тәртіп пен дәл уақытты таңдау болуы мүмкін. Ол Zepeda-ны арақашықтықты қысқарту кезінде қателесуге мәжбүрлеп, позициясын жоғалтқан сәттерін пайдаланбақ.
Америкалық боксшының пікірінше, Zepeda бастапқы жоспарынан ауытқымауы керек. Асығыстық танытса, Roach жекпе-жекті өз бақылауына алуы мүмкін.
Conceição: менің мансабым мықтылармен өткен жекпе-жектерден құралған
Robson Conceição бұл бокс кешінің ең тәжірибелі қатысушысы ретінде Raymond Muratalla-мен кездеседі. Олимпиада чемпионы және екінші жеңіл салмақтағы бұрынғы WBC чемпионы ешқашан өзіне ыңғайлы қарсыластарды таңдауға тырыспағанын айтты.
«Менің мансабым әлемнің ең үздік боксшыларымен өткен жекпе-жектерден құралған. Бұл кездесу — өз деңгейімді дәлелдеудің тағы бір мүмкіндігі», — деді бразилиялық.
Conceição Muratalla-ны жұмыс қарқыны жоғары, арақашықтықты жақсы сезетін және соққы жасау сәтін дәл таңдайтын сенімді чемпион деп санайды. Бірақ бразилиялық оған өз тәжірибесін, техникалық дайындығын және әртүрлі стильдерге бейімделу қабілетін қарсы қоймақ.
Conceição Roach — Zepeda жекпе-жегін де бақылап жүр. Ол болашақта сол кездесудің жеңімпазымен белбеулерді біріктіру үшін жұдырықтасуды жоққа шығармайды. Бірақ алдымен жеңілмеген Muratalla-дан IBF белбеуін тартып алуы керек.
Осылайша, кештің басты тақырыбы екі чемпиондық белбеу үшін таласпен ғана шектелмейді. Zepeda алғашқы жеңілісінен дұрыс қорытынды шығарғанын дәлелдеуі қажет. Roach тағы бір агрессивті қарсыласты тоқтата алатынын көрсетуі тиіс. Ал Conceição 37 жасында да жаңа буын көшбасшыларымен бәсекеге түсе алатынын дәлелдеуге тырысады.
