Жәнібек Әлімханұлы чемпиондық атағын қорғап қалды

5 сәуір күні «Барыс Арена» мұз сарайында (Астана қ.) өткен бокс кешінде IBF және WBO тұжырымы бойынша орта салмақтағы әлем чемпионы Жәнібек Әлімханұлы (16-0, 11 КО) Франциядан келген үміткер Анауэль Нгамиссингені (14-0, 9 КО) 5-раундта нокаутқа жіберіп, өз белбеулерін қорғап қалды.

Кардтың толық нәтижесі:

Жартылай орта салмақтағы жекпе-жек

Әлішер Әбдуәлім (Қазақстан, 3-0, 2 КО) – Ашиш Чаудхари (Үндістан, 3-0, 0 КО) - төреші шешімімен Әлішер жеңіске жетті.

Бокс кешін отандасымыз Әлішер мен үнді өкілі Ашиш ашты. Алғашқы раундта жерлесіміз басымдықты қолға алып, мерзімінен бұрын жеңіске жететіндей көрінген. Алайда қарсылас уақыт өткен сайын бейімделіп, лайықты жауап қайтара білді. Нәтижесінде айқас жоспарланған төрт раундқа жалғасып, Әлішер төрешілердің шешімімен (40:36) жеңіске жетті.

Жартылай орта салмақтағы жекпе-жек


Ақниет Әлімбай (Қазақстан, 2-0, 1 КО) – Йозеф Дубски (Чехия, 1-0, 1 КО) - төрешілердің басым дауысымен (40:36, 38:39, 37:39) Йозеф жеңіске жетті.

Кештің екінші кездесуі де өте тартысты өтті. Ақниет шабуылдап, бірінші нөмірде жұдырықтасуға тырысты. Ал Чехиядан келген Йозеф Дубски қорғаныста жүріп, қарымта шабуылға иек артты. Әр сәтте Йозеф мүмкіндігін қалт жібермей, тараз басын өз жағына аударып кетті. Нәтижесінде төрешілердің екіге бөлінген дауысымен чехиялық боксшы басым түсті.

Жартылай орта салмақтағы жекпе-жек


Төрехан Сабырхан (Қазақстан, дебют) – Йиржи Хауке (Чехия, 4-6, 2 КО) - Төрехан 3-раундта нокаутпен жеңді.

Кештің ең жас қатысушысы, 19 жастағы Төрехан кәсіпқой бокстағы дебютін өткізсе де, өте сенімді өнер көрсетіп, 3-раундта мерзімінен бұрын жеңіске жетті.

Жартылай жеңіл салмақтағы айқас


Отабек Холматов (Өзбекстан, 12-1, 11 КО) – Джейсон Кано Манигос (Филиппин, 30-12-2, 20 КО) - Отабек 8-раундта техникалық нокаутпен жеңді.

2024 жылы АҚШ-та әлем чемпиондығына таласып, соңғы секундтарда есе жіберген Отабек Холматов араға 1 жыл салып, қайта рингке оралды. Ол алғашқы раундтан-ақ басымдықты қолға алды. Тек филиппиндік боксшының шыдамдылығының арқасында ғана айқас 8-раундқа дейін жалғасты. Бірнеше нокдауннан кейін төреші жекпе-жекті тоқтатып, өзбек спортшысына мерзімінен бұрын жеңісті берді.

Жеңіл салмақтағы әйелдердің жекпе-жегі


Балауса Мұздыман (Қазақстан, 6-0, 5 КО) – Мария Тереза Пинили (Филиппин, 7-1, 2 КО) - Балауса 8 раундтың қорытындысы бойынша, төрешілердің бірауыз шешімімен (80-72, 80-72, 79-73) жеңіске жетті.

Екінші жеңіл салмақтағы жекпе-жек


Махмұд Сабырхан (Қазақстан, дебют) – Данг Дак Хайнх (Вьетнам, 2-1, 2 КО) - Махмұд 2-раундта техникалық нокаутпен жеңді.

Бокс кешіне бірер күн қалғанда Махмұд Сабырханның қарсыласы ауысып кеткен еді. Оның орнын алмастырған Данг Дак Хайнх еш қауқар көрсете алмады. Үш мәрте нокдаунға түскен въетнамдық боксшы айқасты жалғастырудан бас тартты.

Бірінші орта салмақтағы жекпе-жек


Батыр Жүкембаев (Қазақстан, 23-1, 17 КО) – Кейн Гарднер (Ұлыбритания, 17-4, 7 КО) - 10 раундтың қорытындысы бойынша, төрешілер бірауыздан жеңісті Батырға берді.

Туған күнімен тұспа-тұс келген кеште 34 жастағы Батыр Жүкембаев алғаш рет Астана төрінде жұдырықтасып, кезекті жеңісін тойлады.

Аса ауыр салмақтағы жекпе-жек


Баходир Джалолов (Өзбекстан, 14-0, 14 КО) – Игорь Шевадзуцкий (Украина, 12-2, 10 КО) - 10 раундтың қорытындысы бойынша, Баходир төрешілердің бірауыз шешімімен жеңіске жетті

2 дүркін Олимпиада чемпионы, 2 дүркін әлем чемпионы Баходир Жалоловтан көпшілік нокаут күткенімен, барылығы ойлағандай болмады. Украиналық боксшы бір мәрте нокдаунға түссе де, айқастың соңына дейін шыдады. Осылайша, Баходир өз мансабында алғаш рет қарсыласын нокаутпен жеңе алмады.

IBF Intercontinental тұжырымы бойынша екінші орта салмақтағы жекпе-жек


Сұлтан Заурбек (Қазақстан, 19-0, 13 КО) – Азинга Фузиле (ОАР, 18-2, 12 КО) - 10 раундтың қорытындысы бойынша, Сұлтан бірауыздан жеңіске жетті.

IBF және WBO тұжырымы бойынша орта салмақтағы чемпиондық айқас


Жәнібек Әлімханұлы (Қазақстан, 16-0, 11 КО) – Анауэль Нгамиссинге (Франция, 14-0, 9 КО) - Жәнібек 5-раундта нокаутпен жеңді.

Бокс кешінің ұйымдастырушысы – Nomad Promotions компаниясы. Бұл компания 2024 жылы құрылған және оның басты мақсаты – әлемдік деңгейдегі кәсіби боксты Қазақстанға қайтару.

Отандық промоутерлік компания 30 жылдан астам тәжірибесі бар британдық Excelsior Sports Club ұйымымен тығыз ынтымақтастық орнатқан.

Nomad Promotions Warrior Season 2025 жобасын іске қосты. Сарапшылардың пікірінше, бұл бастама Орталық Азия спортының дамуына серпін береді. Қазақстанды әлемдік спорт аренасына айналдыру үшін, үш жылдық халықаралық турнирлер жоспары әзірленген.

Осы миссия аясында болашақ чемпиондарды даярлап, оларды жоғары деңгейдегі жекпе-жектерге шығаратын бокс академиясын құру да жоспарланған.

Толық ақпарат: nomad-promotions.com

Ел тарихында алғаш рет екі чемпиондық белбеу үшін өтетін жекпе-жекті жіберіп алмаңыз! 5 сәуір күні «Барыс Аренаға» келіп, чемпионды қолдаңыз!