Irfin Promotions және Елшат Нығметолла келісімге келді
Танымал қазақстандық кәсіпқой боксшы Елшат Нығметолла мен отандық Irfin Promotions промоутерлік компаниясы өзара ынтымақтастықты жалғастыру туралы келісімге келді.
Өз салмағындағы үздік
Қазіргі уақытта Елшат Нығметолла (21-1-0, 8 КО) – 53,5 келіге дейінгі жеңіл салмақта сөзсіз Қазақстандағы ең мықты боксшы.
Ол 31 жаста. Кәсіпқой бокста 22 жекпе-жек өткізіп, 21 жеңіске жеткен, ал 2015 жылы бір жекпе-жегі тең аяқталған. Беделді BoxRec статистикалық рейтингінде өз салмағында 22-орында тұр. Бұл – барлық салмақ санатындағы қазақстандық боксшылар арасындағы ең жоғары көрсеткіштердің бірі.
Ынтымақтастықтың бастауы
Нығметолла мен Irfin Promotions арасындағы серіктестік 2024 жылдың маусым айында Шымкентте басталды. Сол кезде промоутерлік компания өз тарихындағы алғашқы бокс кешін ұйымдастырған. Шымкенттегі алты раундтық жекпе-жекте Елшат өзбекстандық Сарвар Усмоновты (6-3, 5 КО) төрешілердің бірауызды шешімімен жеңді – 60:54, 58:56, 60:54. Яғни, үш төрешінің екеуі қазақстандық боксшыны барлық 6 раундта жеңімпаз деп таныды.
2024 жылдың қыркүйегінде Алматыда өткен Irfin Promotions бокс кешінде Нығметолла танзаниялық Мұхсин Кизотамен (20-6, 12 КО) жұдырықтасты. Жекпе-жек 8 раундқа жоспарланғанымен, 3-раундта аяқталды. Қазақстандық боксшы сол қолымен бауырдан дәл соққы жасап, қарсыласын нокаутқа жіберді.
Чемпиондық белбеу
Осыдан кейін Irfin Promotions боксшыны халықаралық аренада таныту жоспарын жүзеге асыра бастады. 2025 жылдың 1 ақпанында Тайланд астанасы Бангкокта Елшат WBA Asia жеңіл салмақтағы чемпиондық белбеуі үшін жұдырықтасты. Нығметолла бұл белбеуді жеңіп алып, индонезиялық Фласидус Нуноны (10-2-2, 8 КО) мерзімінен бұрын жеңді. 4-раундта Елшаттың соққысынан қарсыласы нокдаунға түсті, ал екінші рет құлаған кезде төреші жекпе-жекті техникалық нокаутпен тоқтатты.
Келесі қадам
Енді Irfin Promotions пен Елшат Нығметолланың әрі қарайғы ынтымақтастығын ресми түрде бекіткен жаңа келісімшартқа қол қойылды. Оның мерзімі – 2 жыл.
Кәсіпқой боксшының ең жақын мақсаттарының бірі – WBA Asia титулын сәтті қорғау. Бұл жеңіс оны жеңіл салмақта әлемдік деңгейдегі боксшылар қатарына жақындата түседі.
