Бенавидес - Моррелл жекпе-жегінен не күтеміз?

Биылғы бокс жылының шымылдығын керемет жекпе-жек ашайын деп тұрғанын көп сарапшы жарыса жазуда. Себебі шаршы алаңда екі хас шебер мен өз ісінің нағыз таланты кездеспек. Біз айтып отырған мегафайт - Дэвид Бенавидес пен Дэвид Моррелл.

Жекпе-жек қашан өтеді?

Америкалық Дэвид Бенавидес (29-0, 24 КО) пен кубалық Дэвид Моррелл (11-0, 9 КО) арасындағы жекпе-жек 2025 жылғы 1 ақпанда, сенбі күні Лас-Вегастағы T-Mobile Arena-да өтеді.

Бұл жекпе-жек жартылай ауыр салмақта (79,4 келіге дейін) 12 раундқа жоспарланған. Кездесуде WBA және WBC белбеулері сарапқа салынады.

Бенавидес пен Морреллдің статистикасы қандай?

• Дэвид Бенавидес: 29 жеңіс (24 нокаут), 0 жеңіліс, 0 тең жекпе-жек.

• Дэвид Моррелл: 11 жеңіс (9 нокаут), 0 жеңіліс, 0 тең жек-жек.

Бенавидестің нокаут пайызы – 83%, Морреллде – 82%. Бенавидес Морреллден екі жас үлкен, ал Морреллдің қол ұзындығы екі дюймге артық. Бенавидес оңқай, ал Моррелл – солақай.

Бенавидес 2013 жылы, Моррелл 2019 жылы кәсіпқой боксқа аяқ басқан. Бенавидес 148 раунд өткізіп, Морреллден 94 раундқа көп жұдырықтасқанына да айта кетейік.

Бенавидес жартылай ауыр салмақта The Ring рейтингі бойынша 2-орында, ал Моррелл сол категорияда 8-орында тұр.

Андеркардта кімдер бар?

Лас-Вегастағы бокс кешін аясында тағы бірқатар керемет жекпе-жектер ұйымдастырылған. Олар:

• Брэндон Фигероа мен Стивен Фултон арасындағы WBC Әлем чемпиондығы үшін (жеңіл салмақ) жекпе-жек.

• Исаак “Питбуль” Крус пен Анхель Фиерроның жекпе-жегі.

• Хесус Рамос пен Джейсон Росарионың кездесуі.

• Мирко Куэлло мен Кристиан Оливо арасындағы жекпе-жек.

• Йоэнли Эрнандес пен Анхель Руис жекпе-жегі.

Боксшылардың қазіргі формасы қандай?

Бенавидес кәсіпқой бокста әлі жеңіліп көрмеген, соңғы 5 қарсыласының 3-еуін нокаутпен жеңді. Соңғы жекпе-жегінде ол 2024 жылғы 15 маусымда Лас-Вегастағы MGM Grand, Grand Garden Arena-да өткен WBC уақытша әлем чемпионатының жеңіл ауыр салмақтағы жекпе-жегінде Александр Гвоздикті төрешілердің бірауыздан қабылданған шешіммен жеңді.

Одан бұрын 2023 жылғы 25 қарашада ол Лас-Вегастағы Michelob ULTRA Arena-да өткен WBC уақытша әлем чемпионатының супер орта салмақтағы жекпе-жегінде Деметриус Андраданы 6-раундта техникалық нокаутпен басым түсті.

Моррелл де кәсіпқой бокста әлі жеңіліп көрмеген, соңғы 5 қарсыласының 4-еуін нокаутқа жіберген. Соңғы жекпе-жегінде ол 2024 жылғы 3 тамызда Лос-Анджелестегі BMO Stadium-да өткен WBA әлем чемпионатының жеңіл ауыр салмақтағы жекпе-жегінде Радивое Калайджичті бірауыздан қабылданған шешіммен жеңді.

Одан бұрын, 2023 жылғы 16 желтоқсанда Миннеаполистегі Armory-де өткен WBA әлем чемпионатының супер орта салмақтағы жекпе-жегінде Сена Агбеконы 2-раундта техникалық нокаутпен жеңді.

Қазақстандық боксшымен жолы түйісті

2022 жылдың қараша айында Моррелл WBA рейтингінде №1 орынды иеленген қазақстандық Айдос Ербосынұлымен (16-1, 11 KO) чемпиондық белбеуін қорғау үшін жекпе-жек өткізді.

Жекпе-жек барысында Айдос өте батыл өнер көрсетті, алайда күш тең емес еді. Моррелл шеберлігі жағынан қарсыласынан айтарлықтай басым болды. Кездесу 12-раундтың аяқталуына 26 секунд қалғанда аяқталып, кубалық боксшы нокаутпен жеңіске жетті. Өкінішке қарай, осы жекпе-жектен кейін Айдос рингке қайта шыққан жоқ.

Бұдан да күрделі жағдай – дәрігерлер оның өмірі үшін күресуге мәжбүр болды. Бас миына қан кету салдарынан Айдосқа шұғыл ота жасалып, оны жасанды комаға түсірді. Ербосынұлы АҚШ-тағы ауруханада шамамен бір ай уақыт өткізді. Осы сәтте көпшіліктің есінде қалған көрініс – нокауттан кейін Моррелл Айдосқа бұрышына жетуге көмектесіп, оны орнына отырғызғаны.