Бекман Сойлыбаевтың сегізінші қарсыласы белгілі болды
18 ақпан күні Америкада өтетін бокс кеші аясында Бекман Сойлыбаев (7 (3 KO) – 0 – 0) Мексиканың қайсар жігіті Мойсес Дельгадилломен (Moises Delgadillo) (15 (8 KO) – 13 – 2) айқасатын болды.
Калифорния штатының Коста Меса қаласында өтетін бокс кешіндегі Бекманның келесі қарсыласы – аса тәжірибелі боксшы. 28 жастағы Мексика майталманы WBC Mundo Hispana тұжырымының чемпиондық белбеуін де жеңіп алған екен. Кәсіпқой бокс рингіндегі алғашқы жекпе-жегін 2004 жылы өткізіпті. Содан бері 30 жекпе-жек өткізген.
Аса жоғары жетістіктері ретінде WBC тұжырымы бойынша жастар арасындағы, сондай-ақ WBC Caribbean Boxing Federation тұжырымы бойынша екінші жартылай жеңіл салмақтағы чемпиондық атаққа таласқандығын айта кетуге болады. Мексиканың Мойсесі соңғы рет рингке Америкада шығып, кіші Луис Рамоспен (25 (10 KO) – 2 – 0) жұдырықтасып, WBC Fedelation тұжырымы бойынша «иесіз» қалған белбеуге таласқан. Бірақ ұтылып қалған.
Сонымен, Бекман Сойлыбаев пен Мойсес Делгадилло 8 раундтық рейтингтік жекпе-жек өткізеді.
– Қарсыласымның кім болатынын күтіп біраз жүрдім, – деді Бекман. – Бірақ бұл мен үшін үйреншікті жай, бірінші рет емес. Сондықтан алаңдамай, әдетегідей жаттыға бердім. Бүгін кіммен жұдырықтасатынымды біліп, Эрик Браун екеуміз онымен қалай айқасатындығымды ойластырып, тактикалық айла-амалдар құрастыра бастадық. Қарсыласым рингті жақсы сезінеді, соқысы да – қуатты. Өте қызықты жекпе-жек болады, әрі Қазақстан жанкүйерлерін қуантамын деп ойлаймын.
Қазақстандық Diamond Ring компаниясының боксшысы Бекман Сойлыбаев қазір көпшілікке танымал Америка маманы Эрик Браунның қол астында жаттығып жүр. Бекман өзінің соңғы жекпе-жегін Киевте өткізіп, Грузияның тәжірибелі тарланбозы Кахабер Аветисянды (43(25KO) – 34 – 1) ұпай айырмасымен болса да, айқын басымдықпен жеңген болатын. Әзірше ол кәсіпқой бокс рингінде жеті жекпе-жек өткізіп, бәрінде де жеңіске жетті. Әрі үш жекпе-жегін мерзімінен бұрын аяқтады.
