Армат Арманұлы: Жүйелі дайындықтың нәтижесінде жеңіске жеттім
21 қыркүйек күні Алматыдағы Sadu Arena кешенінде Irfin Promotions промоутерлік компаниясының ұйымдастыруымен халықаралық кәсіпқой бокс кеші өтті.
Бұл кеште орта салмақтағы отандасымыз Армат Арманұлы (1-1) да өнер көрсетіп, өзбекстандық былғары қолғап шебері Анвар Тұраповпен (9-4, 6 КО) жұдырықтасты. 72,5 келіге дейінгі салмақ дәрежесінде өткен жекпе-жек 4 раундқа жоспарланып, екі боксшы да кездесуді толық жұдырықтасып шықты. Аса тартысты өткен айқаста жерлесіміз қарсыласынан ұпай саны бойынша басым түсті.
Жекпе-жектен кейін Армат кездесу туралы ойын ортаға салып, жанкүйерлерге алғысын білдірді.
«Алматыдағы бокс кеші өте жоғары деңгейде өтті. Әрбір кездесуде жанкүйерлерге ұнайтын жекпе-жектер көрсеттік деп ойлаймын. Біздің жігіттер де, қарсыластарымыз да қарымды болды. Өзбекстандық қарсыласым өте тәжірибелі боксшы, оңай шағылатын жаңғақ емес. Рингте аздаған қиындық тудырды. Бірақ жүйелі дайындығымның нәтижесінде жеңіске жеттім деп ойлаймын. Кәсіпқой боксқа биыл ауыстым. Маусым айында алғашқы кездесуімді өткізіп, жеңіліп қалған едім. Енді, міне, қателіктен сабақ алып, мықты қарсыласты жеңдім. Бізді қолдап келген барша жанкүйерге алғысымды айтамын», - деді Армат Арманұлы.
