Айдар ШӘРІБАЕВ – 100 секундта жеңіске жетті

Бұл жекпе-жек екі минутқа жетпей аяқталды. Амирадзенің бойының биіктігі мен қолының ұзындығы да кәдеге жарамай қалды. Ол Айдардың сол қолымен мұрнынан қойып қалған соққысынан зардап шекті. Амирадзе қызыл жоса қанға бөгіп, төреші жекпе-жекті тоқтатуға мәжбүр болды. Қан тоқтамай қойғандықтан, бұл кездесу доғарылды. Сөйтіп, Айдар 100 секунд ішінде техникалық нокаутпен жеңіске жетті. Әрі кәсіпқой бокс рингіндегі жеңістерін одан әрі сабақтады. Ол үш жекпе-жек өткізіп, үшеуінде де жекпе-жекті аяғына дейін жеткізбей, жеңіске жетті.

– Жеңіске жеткеніме қуаныштымын, бұл жеңісімді барлық Қазақстан халқына арнаймын. Қолдау көрсеткен көрермендер мен бокс жанкүйерлеріне алғысым шексіз!

– Осылай тез жеңіске жетемін деп ойладыңыз ба?

– Тура соққы бағыттаудың сәті түскенде, мұндай мүмкіндікті мүлт жіберу әбестік болар еді. Әрине, мен көрермендерді тартатындай бокс үлгісін көрсетіп, көпшілікті тәнті еткім келді. Оның үстіне, әбден жетілдіріп, дайындап әкелген “сыйлықтарым” да бар еді (күліп). Менің барлық жекпе-жектерім үш раундтан әріге созылған емес. Ал мен болсам, кәсіпқой бокс рингіндегі жекпе-жектерімді бастан-аяқ өткізіп, іс жүзінде өзімді “тексеріп” те алғым да келеді. Тер шығарып дегендей… Әйтсе де, көрермендер риза болды деп ойлаймын. Ал бұл мені үшін – ең бастысы!

– Залда қолдарына ұранды сөздер ұстаған қолдаушыларыңыз өте көп болды. Жанкүйерлеріңіз кімдер еді?

– Алматыда менің туыстарым мен достарым өте көп. Олар мені әрдайым демеп-жебеп отырады. Сол үшін мен оларға дән ризамын.

…Осы ретте айта кетейік, Айдарды құттықтау үшін оның киім ауыстырған бөлмесіне көп адамдар бас сұқты. Олардың арасында Қазақстан шоу-бизнесінің әртістері – Melomen тобының әншісі Жігер Ауыпбаев, «Он и она» сериалының актері Жандос Айбасов, бокстан екі дүркін әлем чемпионы Назым Қызайбай да болды.

– Айдардың өнеріне ризамын, көңілімнен шықты. Ол өз мүмкіндігін қалт жіберген жоқ, ойланбастан ұрды, – деп өз пікірін ортаға салды, Шәрібаевты осы жекпе-жекке дайындаған бапкері Рафик Меңсейітов. – Зазаның бағы бар екен. Егер Айдардың оң қолымен ұрған пәрменді соққысына тап болғанында, онда сөзсіз, жер сүзе құлар еді. Былайша айтқанда, бәрі де – заңды. Айдардың соққысы жойқын, салмағы жеңіл болса да, ауыр салмақтағы алыптар сияқты ұрады.

…Айдар енді өз жоспары бойынша бірнеше күн демалады. Содан соң қайтадан жаттығуды бастайды.

Шәрібаев қазірден-ақ өзінің жақын досы Қанат Исламның Патрик Аллотеймен өтетін, IBO International, WBA Fedelation, WBO Inter-continental тұжырымдарының чемпиондық атақтары сарапқа салынатын жекпе-жегінің андеркартына тіркеліп қойған. Бұл бокс кеші 29 қазан күні Алматыда өтеді.

Реті келгенде айта кетейік, аталмыш бокс кешінде Берікбай Нұрымбетов пен Diamond Ring промоутерлік компаниясының тағы бір боксшысы шаршы алаңға шығады. Фото.