Қазақстанда туған әзербайжан «Токиоға барар жолды» жеңіспен бастады

Токио Олимпиадасының Еуропа елдері арасындағы іріктеу турнирі бүгін «пердесін» түріп, бірінші айналымдағы жекпе-жектері өте бастады. Мәселен, Әзербайжан құрамасының бетке ұстар үздіктерінің бірі, 75 келі салмақ дәрежесіндегі Камран Шахсуварлы Лондон рингіне 1/32-финалында шығып, Австрия боксшысы Эдин Авдичпен жұдырық түйістірді.

Бірінші раунд бір-бірін аңдып, барлаумен өткенімен, екінші раундтан бастап Камран өзінің деңгейі жоғарылау екенін көрсетті. Сөйтіп, Рио Олимпиадасының және 2017 жылғы әлем чемпионатының қола жүлдегері, сондай-ақ 2017 жылғы Еуропа чемпионатының күміс жүлдегері, Ақтөбеде туған боксшы 4:1 есебімен жеңіске жетіп, келесі кезеңге өтті.

Естеріңізге сала кетейік, дәл осы Камран Шахсуварлы 2016 жылы Рио Олимпиадасының ширек финалында біздің Жәнібек Әлімханұлымен кездескен. Тартысты өткен жекпе-жекте төрешілер жеңісті Әзербайжан боксшысына беріп, өзегімізді өртеген болатын. Есеп – 1:2 (28:29, 29:28, 28:29).

Жалпы, Әзербайжан құрамасының сапында бұл жолы да басқа елдерден келген боксшылар баршылық:

52 келі – Руфат Гусейнов

57 келі – Тайфур Алиев

63 келі – Джавид Челябиев

69 келі – Лоренцо Сотомайор

75 келі – Камран Шахсуварлы

81 келі – Альфонсо Домингес

91 келі – Рауф Рагимов

+ 91 келі – Магомед Абдуллаев