Ұйымдастырушылар 12 қыркүйекте Лас-Вегастағы T-Mobile аренасында өтетін бокс кешінің толық құрамын таныстырды. Турнирдің басты жекпе-жегінде Ryan Garcia мен Conor Benn жартылай орта салмақтағы WBC чемпионы атағы үшін кездеседі.
Гарсия чемпиондық белбеуін алғаш рет қорғайды. Америкалық боксшы ақпан айында Mario Barrios-ты он екі раундтың қорытындысы бойынша сенімді жеңіп, титулға ие болған еді.
Бенн Chris Eubank Jr.-мен өткен қарымта кездесуде жеңіске жетіп, кейін Regis Prograis-тен басым түскен соң чемпиондық мүмкіндік алды. Британиялық боксшы төрт жылдан астам уақыттан кейін алғаш рет 66,7 келіге дейінгі салмаққа оралады. Бұған дейін ол бірінші орта және орта салмақтарда өнер көрсетті.
Кардтың тағы бір маңызды жекпе-жегінде бірінші ауыр салмақтың көшбасшысы Jai Opetaia мен Noel Mikaelian кездеседі. Жеңіліп көрмеген австралиялық The Ring және Zuffa Boxing титулдарын қорғайды. Микаэлян — WBC тұжырымы бойынша екі дүркін бұрынғы әлем чемпионы және Опетаяның карьерасындағы ең қауіпті қарсыластардың бірі болуы мүмкін.
Жеңіл салмақта WBC тұжырымының бұрынғы чемпионы Mark Magsayo жеңіліп көрмеген Andres Cortes-пен кездеседі. Сонымен қатар ауыр салмақта Da’Mazion Vanhouter мен Raphael Akpejiori жұдырықтасады. Жас америкалық 19 жеңісінің 18-ін нокаутпен аяқтаған тәжірибелі нигериялыққа қарсы өз деңгейін тексереді.
Кештің алдын ала бөлімінде бірінші жартылай орта салмақтағы бұрынғы біріккен әлем чемпионы Jose Ramirez пен Alexis Rocha кездеседі. Бұл жекпе-жек екі боксшыға да жартылай орта салмақтағы жетекші орындарға жақындауға мүмкіндік береді.
Бокс кешінің толық карды:
Ryan Garcia — Conor Benn
Jai Opetaia — Noel Mikaelian
Mark Magsayo — Andres Cortes
Da’Mazion Vanhouter — Raphael Akpejiori
Jose Ramirez — Alexis Rocha
Oswaldo Molina — Pablo Rubio
Abel Gonzalez — Raul Salomon
Vlad Panin — Dakota Linger
Sean Garcia — Abraham Morales
Алдын ала жекпе-жектердің трансляциясы 13 қыркүйекте Астана уақытымен сағат 02:00-де, ал негізгі кард шамамен сағат 05:00-де басталады. Қазақстандық бокс жанкүйерлері турнирді DAZN стримингтік платформасынан көре алады.
