22 тамызда Teofimo Lopez Лас-Вегастағы T-Mobile Arena-да Rolando Romero-мен кездеседі. 29 жастағы америкалық боксшы үшін бұл жартылай орта салмақтағы алғашқы жекпе-жек болмақ. Жеңіске жетсе, ол үшінші салмақ дәрежесінде әлем чемпионы атана алады.
Лопес кәсіпқой боксқа дейін әуесқойлар арасында үлкен тәжірибе жинады. Көпшілік дерек бойынша, ол шамамен 170 жекпе-жек өткізіп, 150 рет жеңіске жетіп, 20 рет жеңілген. 2015 жылы Теофимо беделді «Алтын қолғап» турнирінде және АҚШ-тағы олимпиадалық іріктеуде топ жарды. Іріктеу кезінде ол Малик Монтгомериді екі рет жеңді. Алайда 60 келіге дейінгі салмақта АҚШ құрамасының Олимпиада жолдамасын Карлос Бальдерас алып қойған еді.
Олимпиадаға қатысу үшін Лопес ата-анасының шыққан тегіне байланысты Гондурас атынан өнер көрсетуге шешім қабылдады. Америка елдерінің іріктеу турнирінде ол Луди Тенорионы, Брайан Гонсалесті және Игнасио Перринді жеңді. Тек финалда венесуэлалық Луис Кабрерадан ұтылды.
2016 жылы Рио Олимпиадасында Теофимо алғашқы жекпе-жегінде француз Софиан Умиаға есе жіберді. Умиа кейін финалға дейін жетіп, күміс медаль жеңіп алды. Осы салмақта Қазақстан атынан Олимпиада-2012 қатысушысы және әлем чемпионатының қола жүлдегері Берік Әбдірахманов өнер көрсетті. Қазақстандық боксшы да алғашқы айналымда Бальдерастан жеңіліп, жарыстан шығып қалды.
Риодағы сәтсіздіктен кейін Лопес бірден кәсіпқой боксқа ауысты. 22 жасында ол Richard Commey-ді нокаутқа түсіріп, IBF чемпионы атанды. Кейін Vasyl Lomachenko-ны сенсациялық түрде жеңді. Одан соң Теофимо бірінші жартылай орта салмаққа көтеріліп, жеңілмеген Josh Taylor-дан WBO және The Ring титулдарын тартып алды.
Енді Shakur Stevenson-нан жеңілгеннен кейін Лопес карьерасының жаңа кезеңін бастайды. Rolly Romero-ны жеңсе, ол үш салмақ дәрежесінде әлем чемпионы атанып, америкалық бокстың басты жұлдыздарының қатарына қайта орала алады. Гондурас атынан алынған Олимпиада жолдамасынан басталған жол Теофимоны тағы бір чемпиондық шыңға алып келуі мүмкін.
