Жәнібек Әлімханұлының жекпе-жегі тікелей эфирде көрсетіледі
Астанадағы «Барыс Арена» спорт кешенінде өтетін Жәнібек Әлімханұлы (16-0, 11 KO) мен Анауэль Нгамиссенгу (14-0, 9 KO) арасындағы бокс кешін отандық «Qazaqstan» және «Qazsport» телеарналары тікелей эфирде көрсетеді. Бұл туралы «Қазақстан» телерадиокорпорациясы «Nomad Promotions» компаниясының өкілдерімен өткен кездесуінен кейін мәлімдеді.
Бокс кеші мұхиттың арғы бетінде де көрсетіледі
5 сәуір күні елордада «Battle of the Brave» атты кәсіпқой бокс кеші өтеді. Кештің басты жекпе-жегінде отандасымыз Жәнібек Әлімханұлы IBF және WBO тұжырымдары бойынша орта салмақтағы чемпиондық белбеулерін қорғайды. Оның қарсыласы – француз боксшысы Анауэль Нгамиссенгу.
«Қазақстан» телерадиокорпорациясы аталған іс-шараның ұйымдастырушысы «Nomad Promotions» компаниясының ресми ақпараттық серіктесі атанды. Корпорация кәсіпқой бокс кешінің толық түсірілімін жүргізіп, халықаралық сигнал таратуды қамтамасыз етеді. Қазақстандықтар жекпе-жекті «Qazaqstan» және «Qazsport» телеарналарынан тікелей эфирде тамашалай алады. Бұдан бөлек, бокс кеші ESPN секілді әлемге танымал спорттық арналарда да көрсетіледі.
«Battle of the Brave»: Кім кіммен жұдырықтасады?
Бұл кеште қазіргі уақытта әуесқой бокстан ұлттық құрама сапында өнер көрсетіп жүрген ағайынды Махмұд және Төрехан Сабырхандар да шаршы алаңға шығады. Олар үшін бұл – кәсіпқой бокстағы алғашқы жекпе-жектер болмақ.
Төрехан Сабырхан елордадағы жекпе-жекте чехиялық Юри Хаукемен (4-6, 2 KO) жұдырықтасады. Бұл айқас жартылай орта салмақта (66,7 кг дейін) өтеді. 29 жастағы Хауке Чехиядан бөлек, Германия, Франция және Ұлыбританияда жекпе-жектер өткізген тәжірибелі боксшы. Ал Төреханның ағасы – Махмұд Сабырхан 55,3 кг дейінгі екінші жеңіл салмақта өнер көрсетеді. Оның қарсыласы – 28 жастағы филиппиндік Джей Френсис Бурай (13-3-1, 3 KO).
Сондай-ақ, Сұлтан Зауырбек пен Батыр Жүкембаев та өз айқастарында бақ сынайды. Батыр Жүкембаев 29 жастағы британиялық Кейн Гарднермен (17-4, 7 KO) күш сынасады. Бұл жекпе-жек жанкүйерлерге аса қызықты болатыны анық. Себебі Гарднер мансабында ешқашан нокаутпен жеңіліп көрмеген, ал отандасымыз қарсыластарының басым бөлігін нокаутпен жеңіп келеді. Сондықтан бұл кездесудің нәтижесі көпшіліктің қызығушылығын туғызатыны сөзсіз.
Сұлтан Зауырбек 28 жастағы Оңтүстік Африка боксшысы Азинга Фузилемен (18-2, 12 КО) жұдырықтасады. 2021 жылы ол IBF тұжырымы бойынша әлем чемпионы атағына үміткер болған, бірақ жапондық Кеничи Огаваға (29-2-1, 20 КО) ұпай санымен есе жіберген. Фузиле – Заурбектің кәсіби мансабындағы ең мықты қарсылас болуы мүмкін.
Сонымен қатар, 5 сәуір күні Өзбекстанның екі дүркін Олимпиада чемпионы Баходир Жалолов кәсіпқой бокстағы шеберлігін көрсетпек. Әзірге оның қарсыласы белгісіз.
Айта кетейік, әлемдік деңгейдегі кәсіпқой бокс кешін «Nomad Promotions» компаниясы ұйымдастырады. Компания директоры Рустам Қуанышәлиевтің айтуынша, аталмыш промоушн алдағы үш жыл ішінде Қазақстан мен Орталық Азияны бокстың ең ірі таланттары үшін тартымды орталыққа айналдырып, бокс тарихында жаңа тараулар жазуды мақсат еткен.
