WBO шешім қабылдады: Жәнібек Әлімханұлы - Хамза Шираз жекпе-жегінен не күтеміз?

Дүниежүзілік бокс ұйымы (WBO) орта салмақтағы әлем чемпионы Жәнібек Әлімханұлы (16-0, 11 КО) мен міндетті үміткер британиялық Хамза Шираз (21-0, 17 КО) арасындағы жекпе-жек бойынша келіссөздерді екінші рет кейінге қалдыруға келісті.

Бастапқыда келіссөздерді аяқтаудың мерзімі 4 қараша болатын, алайда бұл күнге дейін тараптар мәмілеге қол жеткізе алмады. Дегенмен боксшылардың өкілдері, яғни Top Rank (Әлімханұлы) пен Queensberry (Шираз) келіссөздерді жалғастыруға ниет білдірді. Осыдан кейін WBO-ның жаңа президенті Густаво Оливьери екі командадан да 11 қарашаға дейін кейінге қалдыру туралы ресми өтініш жіберуді сұрады.

Америкалық журналист Джейк Донован хабарлағандай, WBO боксшылардың жағдайына кешіріммен қарап, келіссөздер мерзімін тек 3 күнге, яғни 7 қарашаға дейін ұзартуға келісті. Осылайша егер тараптар стандартты Атлант уақыты бойынша сағат 16:00-ге дейін бір-бірімен келісе алмаса, онда промоутерлік сауда-саттық тағайындалады. Бастапқы аукцион бағасы – WBO үшін дәстүрлі деп айтуға болады, демек баға 200 мың доллардан басталады.

Бокс шолушысы Даниэль Макглинчи потенциалды жекпе-жекте Жәнібек Әлімханұлы басым түсетінін болжайды.

Өзінің 7 жылдық кәсіби мансабында бойы 191 сантимтр болатын Шираз негізінен Тайлер Денни, Лиам Уильямс және Брэдли Скит сияқты қарсыластарымен өзіне ыңғайлы жерде, яғни өз отанында ғана кездесіп жүрді. Егер Шираз Жәнібекпен кездессе, ол қазақтың соңғы қарсыласы Андрей Михайлович сияқты ойсырай жеңіледі. Биылғы 1 маусымда Остин қаласында (АҚШ) Уильямспен болған жекпе-жекте Хамза есеңгіреп қалды. Америкалық боксшы оны соңына дейін сабамағаны үшін рақмет айтуы керек, әйтпесе жағдай қиын болар еді. Ол жерде Жәнібек немесе Эрисланди Лара болса, Шираз үшін бәрі біткен болар еді, - дейді сарапшы.

Айта кетейік, қазан айында WBO өзінің 72,6 келіге дейінгі салмақ дәрежесіндегі әлем чемпионы Жәнібек Әлімханұлын (16-0, 11 КО) британиялық Хамза Ширазға (21-0, 17 КО) қарсы титулдық жекпе-жек өткізуге міндеттеді. Осы тұста Шираз орта салмақтағы WBO үміткерлер рейтингінде 1-орында тұрғанын айта кетейік. Әлімханұлы-Шираз арасындағы жекпе-жекте ұйымдастырылатын болса, кездесуде қазақстандық боксшының IBF және WBO белбеулерімен қатар, орта салмақтағы The Ring атағы да сарапқа салынады.