Сойлыбаев пен Аветисян барлық тексерістен өтті

Бүгін Бекман Сойлыбаев пен Кахабер Аветисян медициналық және құжаттық тексерістерден өтіп, ертең рингке шығуға сақадай-сай екендіктерін көрсетті. Киевтегі жекпе-жекке бір күн қалғанда, әдеттегідей мандат комиссиясы боксшылардың барлық құжаттарын тексерді.

Яғни кәсіпқой бокс рингіне шығуға құқық беретін лицензияларын түгендеді. Сонымен қатар, екі боксшы да міндетті медициналық комиссиядан өтті. Сойлыбаевқа да, оның қарсыласына да бұл формальды бақылау ғана болды, себебі Бекман да, Кахабер де бұған дейін Дехтяревтің спорттық медициналық орталығында медициналық ресми куәландырудан өткен болатын.

Боксшылардың денсаулықтары – жақсы, барлық параметрлері – нормаға сай. Лицензиялары да – жарамды. Осылай екеуі де кешке болатын салмақ өлшеу рәсіміне жіберілді.