РЕСМИ: Бетербиев-Бивол реваншының мегакарды жарияланды
Бокс саласының қазіргі ең танымал инвесторы Турки Аль аш-Шейх (Riyadh Season) 22 ақпанда Эр-Риядта (Сауд Арабиясы) өтетін супертурнирдің кардын жариялады.
Бәрі болжағандай мұндай керемет кештің басты жекпе-жегінде қазір Канада елі үшін өнер көрсететін шешен Артур Бетербиев (21-0, 20 КО) пен Қырғызстан тумасы Дмитрий Бивол (23-1, 12 КО) кездеседі. Олар жартылай ауыр салмақтағы абсолютті чемпион атағы үшін реванш өткізетін болады.
Олардың арасындағы алғашқы жекпе-жек қазан айында дәл осы жерде өтіп, Бетербиевтің ұпай бойынша жеңісімен аяқталған еді. Сол кездегі тартысты жекпе-жек жанкүйерлер арасында көп күдік қалдырған болатын. Енді міне бірден реванш ұйымдастырылып, барлық белбеу қайта сарапқа салынады. Кездесудің қалай өткені туралы біздің мына материалымыздан танысып-білуге болады.
Турнирдің екінші жекпе-жегінде ауыр салмақтағы қазіргі және бұрынғы әлем чемпиондары қолғап түйістіреді. IBF белбеуінің иегері британиялық Даниэль Дюбуа (22-2, 21 КО) WBO-ның бұрынғы чемпионы Жаңа Зеландия өкілі Джозеф Паркерге (35-3, 23 КО) қарсы жекпе-жек өткізеді.
Осыған қоса WBC бойынша жеңіл салмақтағы әлем чемпионы америкалық Шакур Стивенсон (22-0, 10 КО) өзінің жас отандасы Флойд Скофилдпен (18-0, 12 КО) кездеседі.
Дәл осы нұсқа бойынша бірақ орта салмақтағы әлем чемпионы доминикалық Карлос Адамес (24-1, 18 КО) міндетті үміткер британиялық Хамза Ширазбен (21-0, 17 КО) жекпе-жекке шығады.
Айта кетейік, дәл осы Шираз қазақстандық Жәнібек Әлімханұлына (16-0, 11 КО) қарсы қарсы жекпе-жектен бас тартқан еді. Осыған орай отандасымыздың алдағы мақсат-жоспары туралы мына материалымызда кеңінен тоқталған едік.
Ал Бетербиев-Бивол 2 карды аясында ұйымдастырылатын толыққанды 4 титулдық жекпе жектен басқа тағы 3 жартылай титулдық кездесу өтеді. Олар:
Вёрджил Ортис (АҚШ / 22-0, 21 КО) пен Исраил Мадримов (Өзбекстан / 10-1-1, 7 КО) 69,9 келіге дейінгі салмақта WBC interim атағын сарапқа салады.
Чжан Чжилеи (Қытай / 27-2-1, 22 КО) және Агит Кабайел (Германия / 25-0, 17 КО) +90,7 келі салмақта WBC interim атағы үшін шаршы алаңға шығады.
Джошуа Буатси (Ұлыбритания / 19-0, 13 КО) мен Каллум Смит (Ұлыбритания / 30-2, 22 КО) 79,4 келі салмақта WBO interim атағы үшін жекпе-жек өткізеді.
