Бивол мен Бетербиев арасындағы үшінші жекпе-жектің уақыты белгілі болды
Жартылай ауыр салмақтағы ресейлік боксшы Дмитрий Бивол (24-1, 12 KO) мен Канада атынан өнер көрсететін Артур Бетербиев (21-1, 20 KO) үшінші жекпе-жекке келісімшартқа қол қойды.
Трилогия болмақ!
Бұл туралы ресейлік боксшының бапкері Дмитрий Кириллов мәлімдеді. Спортшылар басқа ешқандай жекпе-жек өткізбейді, олардың бар назары тек осы көптен күткен трилогияны аяқтауға бағытталады.
«Барлығы жақсы түсінеді, біз тек Бетербиевпен болатын жекпе-жекке назар аударып отырмыз. Оған (Биволға) өзінің ең мықты формасын көрсету үшін сәл көбірек уақыт қажет», — деді Кириллов «Mash на спорте» басылымына берген сұхбатында.
Бивол мен Бетербиевтің үшінші жекпе-жегі қашан өтеді?
Бастапқыда жекпе-жек 2025 жылдың қазан айына белгіленген болатын. Алайда Биволдың командасы кездесуді сәл кейінге шегеруді сұраған соң, ол қараша айына ауыстырылды.
Алдыңғы кездесулер:
- Бірінші жекпе-жек: 2024 жылғы қазанда өтті — жеңісті ұпай санымен Бетербиев иеленді.
- Қайтара жекпе-жек: 2025 жылғы ақпанда өтті — бұл жолы Бивол төрешілер шешімімен жеңіске жетіп, жартылай ауыр салмақта абсолютті әлем чемпионы атанды.
Бивол Бетербиевпен кездесу үшін титулынан бас тартты
2025 жылғы сәуірде Бүкіләлемдік бокс кеңесі (WBC) Дмитрий Биволдан жеңілмеген америкалық Давид Бенавидеске (30-0, 24 KO) қарсы міндетті қорғаныс жекпе-жегін өткізуді талап еткен. Алайда Бивол трилогияны аяқтау үшін абсолютті чемпион атағынан бас тартып, WBC белбеуінен айырылды.
