Қазақстан боксшыларының қатысуымен өткен 2017 жылдың ТОП-7 жекпе-жегі
Назарларыңызға кәсіпқой бокстағы 2017 жылдың ең үздік жекпе-жектерінің қазақи нұсқасын ұсынамыз. Яғни, Қазақстан боксшыларының қатысуымен өткен ТОП-7 жекпе жек.
Өткен жыл еліміздің кәсіпқой боксы үшін сәтті өтті деуге болатын шығар. Боксты кәсіпқой деңгейге көтерген промоутерлердің саны аз да болса артты. Кәсіпқой боксқа қадам басқан жігіттер көбейді. Ал ең бастысы, боксшылар Америкаға аттанып, жергілікті мықтыларға қарсы шаршы алаңға шығатын болды. Жай ғана жекпе-жек өткізіп қайтпай, рейтингтерін көтеріп, елге чемпиондық белбеулермен оралып жүр. Ендеше Қазақстан боксшыларының қатысуымен өткен 2017 жылдың ТОП-7 жекпе-жегін ұсынамыз.
7-орын
Қанат ИСЛАМ (25-0, 20КО) – Брэндон КУК (Канада) /19-1, 12КО/
Қыркүйектің 9-ы күні Қанат Ислам Астананың «Сарыарқа» спорт кешенінде жеңілістің кермек дәмін татып көрмеген, барлық жекпе-жектерін жеңіспен аяқтаған канадалық Брэндон Кукты қабылдады. Әу баста, америкалық Джэймс Кирклендпен жұдырықтасады деп күтілген. Алайда, бұл «Қазақ» промоутерлерінің кезекті PR-ы болды ма, әлде расымен де америкалық боксшы Қанат Исламмен айқасуға жүрексінді ме, әйтеуір шаршы алаңға екі жылда бір шығатын Кирклендтің орнына Астанаға Брэндон Кук келді. Неде болса, бұл Қанат Исламның кәсіпқой карьерасындағы ең мықты қарсылас еді. 12 раундқа жоспарланған жекпе-жек тартысты өтіп, Кук та жерлесіміздің ауыр соққыларына шыдас берді. Дегенмен, 9-раундта Қанаттың қарқынды шабуылдарына қарсылық көрсете алмаған канадалық боксшы төрешінің араласуымен аман қалды. Ал «The Qazaq» өзінің екі белбеуін өзінде қалдырды.
6-орын
Батыр ДЖҮКЕМБАЕВ (11-0, 9КО) – Космо РИВЕРА (Мексика) /41-24-3, 28КО/
Батыр Джүкембаев биыл төрт жекпе-жек өткізді. Төрт айқасы да Канадада. Шынын айтсақ, қарсыластары аса қарымды болған жоқ. Бірақ, арасындағы ең тәжірибелісі мексикалық Космо Ривера еді. 41 жастағы боксшының өз дәуірінде көрмегені жоқ. Талай белбеуге таласты. Көбінде жеңілді. Осы жолы да кезекті чемпиондық атаққа таласуға мүмкіндік алды. Ал Батыр Джүкембаев бұған дейін ешқашан 10 раундтық айқасқа шықпаған еді. Жекпе-жекті жетіншісінде аяқтап, ІВО International белбеуін жеңіп алды. Дегенмен, оның басты айқастары әлі алда деп ойлаймыз.
5-орын
Бекман СОЙЛЫБАЕВ (12-0, 4КО) – Самуэл ГОНСАЛЕС (Мексика) /16-5, 10КО/
Бекманға дейін төрт рет жеңіліп қалғанына қарамастан бұл жолғы қарсыласы басы темірден, жұдырығы болаттан жаралған панчер еді. Бірінші раундтан-ақ Сойлыбаевты соққыға жығып, бірден құлатуға тырысты. Бірақ, талайды көрген жерлесіміз қарсыласының соққыларын өзіне жуытқан да жоқ. Ал айқастан соң жергілікті мамандар Бекманның өнеріне «Мэйуезер стайл» деп баға берді. Бұл жекпе-жек жерлесімізге WBC International чемпиондық белбеуін алып берді.
4-орын
Жанат ЖАҚИЯНОВ (27-2, 18КО) – Райан БАРНЕТТ (Ұлыбритания) /18-0, 9КО/
Жерлесімізді жеңілді деуге қимайсың. Егер жекпе-жек Англияда емес, басқа елде өткенде жеңіс сөз жоқ, Жақияновқа берілер еді. Барнеттің отаны Белфаста өткен айқаста Жанат қарсыласын құлата алмады. Ал жеңгенінде өзінің WBA және ІВО чемпиондық атақтарына IBF әлемдік белбеуін де қосар еді. Өкінішке қарай, екеуінен де айрылып қалды.
3-орын
Геннадий ГОЛОВКИН (37-0-1, 33КО) – Дэниел ДЖЕЙКОБС (АҚШ) /33-2, 29КО/
Бұған дейі қарсыластарының барлығын қоғадай жапырып келген Геннадий Головкин жанкүйерлерін «жаман» үйретіп алды. 18 наурызда Нью-Йоркте Дэниэл Джейкобспен кездесті. Кезінде бір рет нокаут алғаны бар америкалықты да оңай ұтатынына көбі сенімді еді. Бірақ, жекпе-жек толық 12 раундқа созылып, Triple G тек төрешілердің шешімімен жеңіске жетті. Ертеңінде әлем жанкүйерлері екіге жарылды. Бірі Головкин қартайды десе, екіншілері Джейкобстың шынымен де мықты болғанын айтып жатты.
2-орын
Жанат ЖАҚИЯНОВ (27-2, 18КО) – Роши УОРРЕН (АҚШ) /15-2, 4КО/
Жанат Жақияновтың жұлдызы жанған кеш еді. АҚШ-та Роши Уорренмен кездесті. Екеуінің де бір-бір жеңілісі болғанымен Роши Уорренде WBA және ІВО чемпионы деген атақ бар еді. Сол атағын қорғау үшін Уоррен өзіне қарсылас ретінде Жақияновты таңдады. Ол кезде көпшілікке белгісіз болған қазақ баласын оңай ұтып алуды көздесе керек. Жекпе-жек расымен де біздің боксшы үшін сәтсіз басталып, бірінші раундта-ақ екі рет құлады. Дегенмен, үшінші раундтан кейін есін жиып, қарсыласын соққының астына алды. Ал төрешілер жерелсіміздің жігерлігіне сүйсініп, жеңісін мойындады. Өкінішке қарай, Жанат оны өзінде сақтай алған жоқ. Келесі айқасында-ақ барлық белбеулерінен айрылып қалғанын жоғарыда атап өткенбіз.
1-орын
Геннадий ГОЛОВКИН (Қазақстан) /37-0-1, 33КО/ – Сауль АЛЬВАРЕС (Мексика) /49-1-2, 34КО/
Ал бірінші орында Геннадий Головкин мен Сауль Альварес айқасы. Әлемдегі үздік айқастардың бірі болған бұл жекпе-жек қазақстандықтар үшін де сөзсіз ең маңызды кездесу болды. Үш жыл күтіп, екі жыл пісірген бұл жекпе-жек Р4Р үздігін анықтап беруі тиіс болған. Алайда, қос мықтының бірінші кездесуі тең аяқталып, to be continued 2018 жылға қалдырылды. Айқастың қалай өткенін айтып, тәптіштемей-ақ қояйық. Оны бәріңіз де көрдіңіздер. Енді тек жалғасын күту ғана қалды.
Әлбетте, өзге боксшыларымыз үшін де табысты жыл болды. Айдар Шәрібаев үш айқас өткізіп, рейтингін көтерді. Али Ахмедов бір тұжырым бойынша жастар арасындағы әлем чемпионы атанды. Мейірім Нұрсұлтанов, Мадияр Ашкеев сынды жігіттер де өз жекпе-жектерінде жеңіске жетті. Қатарға Иван Дычко қосылды. Дегенмен, осы маусым өткен жылдан да табысты болуы тиіс.
