Айдар Шәрібаевтың болашақ қарсыластары чемпиондыққа таласады

Қаңтардың 20-сы күні АҚШ-тың Бруклин қаласында жеңіл салмақтағы америкалық боксшы Роберт Истер өзінің IBF тұжырымындағы чемпиондық белбеуін қорғау үшін шаршы алаңға шығады. Ал 27 қаңтарда Инглвудта WBA тұжырымының чемпионы венесуэлалық Хорхе Линарес жекпе-жек өткізеді.

Кәсіпқой бокста 20 айқас өткізіп, барлығында жеңіске жеткен, оның 14-інде қарсыласын нокаутқа жіберген сұңғыла бойлы қара жігіт кіші Роберт Истер доминикандық әккі боксшы Хавьер Фортунамен айқасады. Фортунаң да оңай жағылар жаңғақ емес. Кәсіпқой бокста 35 жекпе-жек өткізіп, соның 33-інде жеңіске жеткен. 23 айқасын нокаутпен аяқтаған. Бір жеңілісі және бір тең кездесуі бар. Кезінде WBA чемпионы болған. Дегенмен, Истердің басты артықшылығы – бойы мен қолының ұзындығында. Бойы – 180 см. Салыстырмалы түрде айтар болсақ, Фортунаның бойы 168 сантиметрді құрайды. Boxrec рейтингінде Истер жеңіл салмақта көш бастап тұрса, Фортуна 9-сатыға жайғасқан.

Енді 27 қаңтардағы жекпе-жек туралы. АҚШ-тың Инглвуд қаласында WBA тұжырымының чемпионы 32 жасар Хорхе Линарес пен филиппиндік Мерсито Геста шаршы алаңға шығады. Венесуэлалық боксшы кәсіпқой бокста 2002 жылдан бері жүр. 46 жекпе-жек өткізіп, соның 43-інде жеңіске жеткен. 27 айқасын нокаутпен аяқтаған. Бірақ ұтылған үш кездесуінде де өзі нокаутқа түскен екен. Қазір Boxrec рейтингінде 2-ші орында тұр. Ал оның қарсыласы 30 жасар Мерсито Геста әлемдік рейтингте 25-ші орында тұрғанымен кәсіпқой бокста 34 айқас өткізіп үлгеріп, соның 31-ін жеңіспен аяқтаған. Біреуінде ұтылып, екеуінде тең түскен. 2012 жылы ІВҒ белбеуіне таласқанымен сол жекпе-жекте жеңіліс тапқан.

Айта кетейік, бұлардың барлығы қазақ боксшысы Айдар Шәрібаевтың болашақтағы потенциалды қарсыластары. Дәл осы салмақта өнер көрсететін жерлесіміз кәсіпқой бокста жеті жекпе-жек өткізіп, барлығында жеңіске жеткен. Алтауында қарсыластарын сұлатып түсірген. Қазір әлемдік аренада WBA тұжырымы бойынша өрлеп келеді.