5 СӘУІРДЕГІ АСТАНАДА ӨТЕТІН БОКС КЕШІ: НЕГІЗГІ 5 ЕРЕКШЕЛІК
Ringkz.com порталы 5 сәуірде Астанада өтетін Battle of the Brave (Ержүректер шайқасы) бокс кешінің Қазақстандағы басқа осындай іс-шаралардан қандай ерекшелігі бар екеніне тоқталды.
1. Әлем чемпионының екі белбеуі үшін жекпе-жек
Бұл ең айқын ерекшелік. Бұған дейін Қазақстанда әлем чемпиондық титулы үшін жекпе-жектер өткен болатын, бірақ бірден екі беделді нұсқа бойынша осындай кеш бұрын-соңды болмаған. Сондықтан 5 сәуірде Астанада Battle of the Brave кешінде бұл тарихи сәт алғаш рет болады!
Франциядан келген Анауэль Нгамиссенге (14-0, 9 КО) мен қазақстандық Жәнібек Әлімханұлы (16-0, 11 КО) арасындағы жекпе-жекте IBF және WBO нұсқалары бойынша әлем чемпионы атақтары қорғалатын болады.
2. Орталық Азия боксы жаңа деңгейге көтеріледі!
5 сәуірдегі Астанадағы бокс кеші – Қазақстан мен Орталық Азияны әлемдік бокс орталығына айналдыруға бағытталған амбициялы жоспардың жарқын бастамасы.
Battle of the Brave кешіне Орталық Азия аймағының ең мықты боксшылары қатысады:
Жәнібек Әлімханұлы (16-0, 11 КО), Қазақстан – IBF және WBO нұсқалары бойынша орта салмақта (72,6 кг) әлем чемпионы;
Баходир Жалолов (14-0, 14 КО), Өзбекстан – екі дүркін Олимпиада чемпионы, суперауыр салмақ боксшысы;
Сұлтан Заурыбек (19-0, 13 КО), Қазақстан – WBA рейтингі бойынша екінші жартылай жеңіл салмақта (59 кг) әлемдік ТОП-3 қатарында;
Отабек Холматов (12-1, 11 КО), Өзбекстан – WBA рейтингі бойынша жартылай жеңіл салмақта (57,2 кг) ТОП-3 қатарында, ал оның жекпе-жегі The Ring журналының "2024 жылдың үздік жекпе-жегі" номинациясына ұсынылған;
Батыржан Жүкембаев (23-1, 17 КО), Қазақстан – бірінші жартылай орта салмақта (63,5 кг) өнер көрсететін Қазақстанның ең танымал кәсіпқой боксшыларының бірі;
Балауса Мұздыман (6-0, 5 КО), Қазақстан – жеңіл салмақта (53,5 кг) WBA Asia чемпиондық белбеуінің иегері. Оны Қазақстан спортының ең көрікті спортшыларының бірі деп те атайды.
3. Әрбір жекпе-жек – басты оқиға
Қазақстандағы кез келген басқа бокс кешінде Battle of the Brave кешіндегі кез келген 5 жекпе-жек басты оқиға болар еді! Бұл кеште бірден Жәнібек Әлімханұлы, Баҳодир Жалолов, Сұлтан Заурбек, Отабек Холматов және Батыржан Жүкембаев сияқты жұлдызды боксшылар өнер көрсетеді.
Сондықтан 5 сәуірде Астанадағы бокс кеші – Қазақстан тарихындағы ең жұлдызды бокс кеші болмақ.
4. Әлемдік промоутерлік компаниямен серіктестік
Бұл кешті ұйымдастырып отырған – Nomad Promotions промоутерлік компаниясы, оның бас директоры Рүстем Қуанышалиев. Сондай-ақ Ұлыбританияның мамандары да бұл компанияның жұмысына белсенді атсалысуда.
Бірақ ең маңыздысы – бұл кештің әлемдегі ең беделді промоутерлік компаниялардың бірі Top Rank-пен бірлесіп ұйымдастырылуы.
Жекпе-жектерді тікелей эфирде ESPN арнасы көрсетеді, демек, бұл оқиғаны бүкіл әлем тамашалайды!
5. Жоғары деңгейдегі қарсыластар
Бұл кештің тағы бір ерекшелігі – қазақстандық боксшылардың қарсыластарының деңгейі өте жоғары.
Мысалы, Сұлтан Заурбек өзінің мансабында алғаш рет Азинга Фузиле (18-2, 12 КО) сияқты мықты қарсыласпен кездеседі. Ол IBF нұсқасы бойынша әлем чемпионы атағы үшін жекпе-жек өткізген тәжірибелі боксшы.
Ал Жәнібек Әлімханұлы ғана емес, оның қарсыласы Анауэль Нгамиссенге де BoxRec рейтингі бойынша әлемнің ТОП-10 қатарына кіреді.
5 сәуірде Астанада өтетін Battle of the Brave кеші – Қазақстан боксының жаңа деңгейге шығатын тарихи сәті!
