8 тамызда Дублиндегі 3Arena-да ZuffaBoxing10 турнирі өтеді. Кештің басты жекпе-жегінде Aaron McKenna мен Etinosa Oliha орта салмақтағы бос тұрған IBF әлем чемпионы атағын сарапқа салады.
Бұл белбеу қазақстандық жанкүйерлерге жақсы таныс. Әр жылдары оны Геннадий Головкин мен Zhanibek Alimkhanuly иеленген. Енді жеңіліп көрмеген екі боксшының бірі жаңа чемпион атанады. Ирландиялық McKenna-ның рекорды — 20-0-0, ал италиялық Oliha 22 жекпе-жегінің барлығында жеңіске жеткен.
Егер Meiirim Nursultanov WBC тұжырымы бойынша уақытша әлем чемпионы Jesus Ramos Jr.-ды жеңіп, орта салмақтың үздіктері қатарынан орын алса, McKenna мен Oliha-ның кез келгені оның болашақ қарсыласына айналуы мүмкін.
McKenna жоғары қарқынмен жұдырықтасады, аяқпен жақсы қозғалып, соққыларын сериямен бағыттайды. Ал тәжірибелі Oliha күшке негізделген боксты ұнатады, қарсыласына қысым жасап, жақын қашықтықта қауіпті әрекет етеді.
Бұл турнирді толықтай дерлік «орта салмақ кеші» деп атауға болады. Кештің екінші басты кездесуінде танымал ирландиялық Callum Walsh Еуропаның бұрынғы чемпионы Tyler Denny-мен жұдырықтасады. Сонымен қатар 72,6 келіге дейінгі салмақта Sam Hickey — Brad Axe және Louis Green — Daniel Buciuc жекпе-жектері өтеді. Негізгі кардтағы орта салмаққа жатпайтын жалғыз кездесу — жартылай ауыр салмақтағы Joe Ward пен Artjom Kasparian жекпе-жегі.
Осылайша Дублиндегі турнир орта салмақтағы жағдайды айтарлықтай өзгертуі мүмкін. Жаңа IBF чемпионы анықталады, ал кардқа қатысатын бірнеше боксшы Мейірім сәтті оралған жағдайда оның болашақ қарсыласына айналуы ықтимал.
Негізгі кардтың тікелей трансляциясы 8 тамызда Астана уақытымен шамамен сағат 23:00-де Paramount+ стриминг платформасында басталады.
